Партыя БНФ » Асноўныя кірункі дзейнасьці Партыі БНФ на пэрыяд 2018-2020 гг.
Партыя БНФ - партыя абароны народных інтарэсаў


Асноўныя кірункі дзейнасьці Партыі БНФ на пэрыяд 2018-2020 гг.

Пры вызначэньні кірункаў нашай дзейнасьці ды ў сваім плянаваньні мы грунтуемся перадусім на рашэньнях, якія былі прынятыя Зьездам Партыі БНФ у 2017 годзе. Яны адлюстроўваюць нашую прыхільнасьць палітычнаму курсу:

  • на ўмацаваньне ўласнай палітычнай, каштоўнаснай, ідэйнай ідэнтычнасьці;
  • на пазыцыянаваньне Партыі БНФ як галоўнай нацыянальнай, незалежніцкай і кансэрватыўнай сілы ў Беларусі;
  • на гуртаваньне вакол сябе арганізацыяў, суполак ды асобаў з блізкімі поглядамі;
  • на каштоўнаснае ды інфармацыйнае дыстанцыяваньне ад састарэлых неэфэктыўных мэтадаў, аб’яднаньняў ды асобаў з шэрагаў апазыцыі, якія пазбаўленыя прабеларускага духу.

Найбліжэйшыя гады мы разглядаем як цэласны палітычны цыкль, кульмінацыяй якога будуць прэзыдэнцкія і парляманцкія выбары ў 2020, альбо ў 2019 годзе.

Мы зыходзім з таго, што найбліжэйшыя парляманцкія і прэзыдэнцкія выбары ня будуць свабоднымі ды сумленнымі. Мы бачым надзвычай важнай і рэалістычнай мэтай гэтага працэсу дасягнуць ўзроўню падтрымкі ў грамадзтве для Партыі БНФ і яе лідэраў (старшыні, кандыдата ў прэзыдэнты, мясцовых лідэраў) дастаткова высокай, каб забясьпечыць крытычна важны для краіны палітычны ўплыў, у тым ліку магчымасьці:

  • мець ключавыя ролі ва ўнутраным дыялёгу (нават калі такі будзе адбывацца не наўпрост, а завочна);
  • эфэктыўней прасоўваць каштоўнасьці нацыянальнай салідарнасьці, незалежнасьці;
  • урэшце, большыя магчымасьці дамагацца сумленнага падліку галасоў, ды вольных умоваў агітацыі.

Сёньня Партыя БНФ ёсьць адзінай палітычнай сілай, якая пасьлядоўна выступае ў абарону нацыянальных інтарэсаў беларускага народу, пры гэтым прынцыпова ня хіліцца пад уплывамі ані з боку дзяржавы, ані з боку міжнародных лябісцкіх структураў, і мае значны чалавечы патэнцыял. Мы ўсьведамляем, што пагроза крамлёўскага рэваншызму істотна вырасла. Масква актыўна імкнецца выгадаваць варожыя беларускай дзяржаўнасьці арганізацыі і групоўкі ў нашай краіне, займаецца вярбоўкай і прапагандай. Гэта вельмі сур’ёзны выклік. Таму ў найбліжэйшыя часы, праца на павелічэньне нашага ўплыву ў грамадзтве будзе, фактычна, фундамэнтальнай часткай стратэгіі абароны і ўмацаваньня незалежнасьці. Працай, якая можа перадвызначыць лёсы краіны і нашых нашчадкаў. Ніхто ня можа зрабіць гэтага замест нас.
 

Мэты на 2018-2020 гг.:

  • Сфармаваць вакол БНФ шырокі нацыянальны фронт, у якім будзе месца і праца для кожнага, хто матываваны нацыянальнай ідэяй.
  • Павялічыць інтэнсіўнасьць, а галоўнае эфэктыўнасьць кантакту з грамадзтвам, абараняць нацыянальныя, эканамічныя і сацыяльныя інтарэсы беларускага народу як на ўзроўні краіны, так і ў мясцовых супольнасьцяў. Выйсьці на ўзровень грамадзкай падтрымкі нашых пазыцыяў 30%.
  • Нацыянальныя кансэрватыўныя сілы на чале з БНФ павінныя мець сталы кантакт і падтрымку з боку нацыянальнага бізнэсу.
  • Кіраваныя і аплачаныя Крамлём антыбеларускія прапагандыскія рэсурсы ў Беларусі, вынікам дзейнасьці якіх ёсьць падрыў незалежнасьці нашай краіны, павінныя быць выкрытыя і маргіналізаваныя.
  • Дамагчыся зьмяншэньня вагі і уплываў на Беларусь кіраваных Крамлём структураў, якія дзейнічаюць супраць нацыянальных інтарэсаў нашае краіны.
  • Дамагчыся больш актыўнага далучэньня Беларусі да супрацы з эўраатлянтычнай супольнасьцю.

 

Кірункі працы з грамадзтвам:

I. Абарона ды ўмацаваньне незалежнасьці,

  • падрыхтоўка ды арганізацыя мерапрыемстваў дзеля адзначэньня 100 угодкаў абвяшчэньня незалежнасьці БНР цягам 2018 году, а таксама ўгодкаў абвяшчэньня незалежнасьці БНР у 2019 і 2020 гг.;
  • кампанія супраць працягу дамовы на разьмяшчэньне ў Беларусі расейскіх вайсковых аб’ектаў.

II. Умацаваньне нацыянальнай ідэнтычнасьці,

  • кампанія за пашырэньне рэальнага патрыятычнага выхаваньня ў беларускім войску, за перавод выхаваўчай працы ў войску на беларускую мову ў якасьці першага этапу да поўнага пераводу на беларускую мову ўсёй жыцьцядзейнасьці беларускага войска (служба, баявая работа, тэхнічнае абслугоўваньне і г.д.);
  • кампанія за зьмены ў Канцэпцыі нацыянальнай бясьпекі ў адпаведнасьці з Праграмай Партыі БНФ;
  • кампанія за беларусізацыю сістэмы адукацыі ўсіх узроўняў і формаў;
  • кампанія па дэкамунізацыі і дэсаветызацыі Беларусі.

III. Пашырэньне нацыянальных, незалежніцкіх і кансэрватыўных перакананьняў у грамадзтве,

  • кампанія ў падтрымку сям’і;
  • кампанія за ўмацаваньне самаўсьведамленьня беларусаў як адказных грамадзянаў — гаспадароў свайго краю;
  • кампанія ў абарону і за пашырэньне ўжываньня гістарычных нацыянальных сымбаляў.

IV. Фармаваньне ініцыятыўнай групы партыйнага кандыдата на прэзыдэнта Аляксея Янукевіча, якая мусіць уключаць у сябе кола шырэйшае за палітычных актывістаў, ды актыўная падрыхтоўка да збору 120 тысячаў подпісаў,

  • фармаваньне нацыянальнага ды рэгіянальных штабоў;
  • падрыхтоўка выбарчай плятформы Партыі БНФ на прэзыдэнцкія і парляманцкія выбары 2019-2020 гг.

V. Фармаваньне партыйнага сьпісу кандыдатаў на выбарах у Палату Прадстаўнікоў на 101 акругу.

VI. Спрыяньне нацыянальнаму абуджэньню беларускае моладзі, актывізацыя ды заахвочваньне моладзі да грамадзка-палітычнай дзейнасьці пад лідэрствам Моладзі БНФ.

VII. Распрацоўка на базе партыйнай праграмы ды папулярызацыя ў грамадзтве канцэпцыяў разьвіцьця найбольш важных сфэраў жыцьця краіны і грамадзтва (рост ВУП і заробкаў, адукацыя, мэдыцына, падтрымка сем’яў, нацыянальная бясьпека, ІСТ сэктар, ЖКГ ды інш.); падрыхтоўка і прасоўваньне асобных законапраектаў, альбо прапановаў зьменаў у заканадаўстве.

VIII. Абарона інтарэсаў малога ды сярэдняга бізнэсу.

IX. Распрацоўка ды пашырэньне ў грамадзтве канцэпцыяў рэгіянальнага (Міжмор’е) ды эўраатлянтычнага супрацоўніцтва як міжнародных падставовых умоваў бясьпекі ды дабрабыту нашага народу.

X. Пашырэньне кантактаў ды супрацоўніцтва з асобнымі агульнанацыянальнымі ды лякальнымі групамі ў грамадзтве (СМІ, экспэрты, цэрквы, НДА, заўзятары спорту, актывісты аховы жывёлаў ды інш.)

XI. Лякальныя сацыяльна-эканамічныя кампаніі.

 

Кірункі ўнутрыпартыйнай працы:

I. Партыйнае навучаньне:

  • ідэалёгія і праграма Партыі БНФ;
  • партыйнае будаўніцтва;
  • нашыя адказы на выклікі сучаснасьці;
  • інфармацыйная праца;
  • правядзеньне кампаніяў.

II. Умацаваньне дзеючых ды стварэньне новых рэгіянальных структураў:

  • сустрэчы нацыянальнага кіраўніцтва ў структурах;
  • мясцовыя кампаніі.

III. Прыцягненьне новых сябраў у партыю.

IV. Удасканаленьне вонкавай інфармацыйнай працы:

  • сацыяльныя сеткі;
  • рэпрэзэнтацыйныя партыйныя матэрыялы (у тым ліку і традыцыйныя улёткі, буклеты, так і новыя мэдыі, ды нестандартныя формы);
  • артыкулы;
  • відэа.

V. Удасканаленьне ўнутранай інфармацыйнай працы ды партыйнай камунікацыі:

  • абнаўленьне электронных базаў;
  • электронныя рассылкі.

VI. Удасканаленьне сыстэмы фандрэйзынгу.

VII. Разьвіцьцё Моладзі БНФ, больш шчыльная інтэграцыя нацыянальных ды рэгіянальных лідэраў Моладзі БНФ у дзейнасьць структураў партыі.

 

Кірункі міжнароднай дзейнасьці:

I. Умацаваньне супрацоўніцтва ды павелічэньне ролі партыі БНФ у Альянсе кансэрватараў ды рэфармістаў (ACRE), ды Міжнародным Дэмакратычным Зьвязе (IDU).

II. Пашырэньне двухбаковага супрацоўніцтва з партнэрскімі ды сястрынскімі партыямі (польская PiS, брытанская Conservative Party, чэская ODS, латвійская TB/LNNK, Рэспубліканская партыя ЗША).

III. Удасканаленьне працы з міжнароднымі арганізацыямі, міністэрствамі замежных справаў ды парлямэнтамі краінаў Эўропы, ЗША, Канады ды інш;Удасканаленьне інфармацыйнай працы партыі ў міжнародным полі (уключна з працай з журналістамі замежных СМІ).

IV. Пашырэньне і ўмацаваньне працы з беларускай дыяспарай у замежжы.

Травень 2018
Пн Аў Сер Чц Пт Сб Ндз
« Кра    
 123456
78910111213
14151617181920
21222324252627
28293031  
© 2011 - 2018 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.