Лідзкі актывіст Валеры Мінец неаднойчы браў удзел у менскіх акцыях, у тым ліку і ў «Маршы недармаедаў».

Пра затрыманьне Мінец паведаміў Радыё Свабода праз тэлефон. Ён пасьпеў сказаць, што ехаў у машыне і яго спынілі супрацоўнікі ДАІ.

— Мне сказалі, што я мушу праехаць зь імі ў РАУС, і болей нічога не патлумачылі. Я думаю, што на мяне хочуць скласьці пратакол за ўдзел у менскім «Маршы недармаедаў», а затым асудзіць, каб я ня трапіў 25 сакавіка на Дзень Волі ў Менск.

Калі Валерый Мінец выйшаў з машыны яго затрымалі, пасадзілі ў міліцэйскую машыну і павезлі ў Лідскі РАУС – паведамляе Радыё Рацыя.

Таксама у Лідзкі РАУС выклікалі актывіста зь Бярозаўкі, сябру Сойму Партыі БНФ Вітольда Ашурка. Яму сказалі, што на яго таксама маюць скласьці пратакол за ўдзел у менскім «Маршы недармаедаў».

Па словах актывіста, позва ў міліцыю за масавае мерапрыемства месячнай даўнасці – спроба пакараць яго напярэдадні Дня Волі адміністрацыйным арыштам і, такім чынам, не даць адсвяткаваць яго на свабодзе.

– Паехаць у Лідскі РАУС, атрымаць напярэдадні Дня Волі некалькі сутак (колькі ўжо дадуць) і адсвяткаваць 25 сакавіка за кратамі лічу для сябе абразай. Пасля правядзення Дня Волі ў Менску і Лідзе, безумоўна, я гатовы адсядзець столькі сутак, колькі мне дадуць, але толькі пасля Дня Волі – сказаў Вітольд Ашурак у камэнтары Радыё Рацыя.

Вітольд Ашурак не адмаўляе факту свайго ўдзелу ў “Маршы недармаедаў” 17 лютага і гатовы адбыць любое пакаранне, але пасля Дня Волі. Ён таксама не выключае свайго затрымання непасрэдна 25 сакавіка ў Менску ці на акцыі ў Лідзе, якая мусіць адбыцца 26 сакавіка ў 14 гадзін.