Партыя БНФ » Суд адхіліў пазоў сябры БНФ Вадзіма Саранчукова да прапагандыстаў з БТ
Партыя БНФ - партыя абароны народных інтарэсаў


Суд адхіліў пазоў сябры БНФ Вадзіма Саранчукова да прапагандыстаў з БТ

Дададзена 15.07.2017 12:44:23 | 267 праглядаў

У пятніцу 14 ліпеня суд ленінскага раёну Гародні не задаволіў пазоў старшыні Гарадзенскай арганізацыі Партыі БНФ Вадзіма Саранчукова да Гарадзенскай абласной тэлерадыёкампаніі пра абарону гонару, годнасьці і дзелавой рэпутацыі.

Падставай для скаргі стаў відэаматэрыял журналістаў пад назвай «Маршем в никуда», у якім, на думку Вадзіма Саранчукова, у дачыненні да яго асобы былі прадстаўлены непраўдзівыя звесткі, якія зневажаюць яго і прыносяць шкоду дзелавой рэпутацыі. Суддзя Ксенія Стасюкевіч правяла даследаваньне доказаў па справе і не задаволіла іскавыя патрабаваньні.

Суд, аднак, зьвярнуў увагу на парушэньне заканадаўства тэлерадыёкампаніяй, якая своечасова не адказала на скаргу Саранчукова, і вынес на адрас тэлерадыёкампаніі прыватнае вызначэньне.

Таксама судзьдзя адхіліў хадайніцтва прадстаўніка тэлерадыёкампаніі, які прасіў весьці працэс па-расейску.

Падчас працэсу прадстаўнік тэлерадыёкампаніі настойваў, што распаўсюджаныя ў тэлесюжэце зьвесткі праўдзівыя. Ён сказаў, што Саранчукоў зарэгістраваўся рамесьнікам толькі дзеля дэкрэту № 3 і рамесьніцтвам займаецца фіктыўна, а ягоных працаў ніхто ніколі ня бачыў. Паводле прадстаўніка тэлерадыёкампаніі, пазоўнік 10 гадоў нідзе не працаваў, не плаціў падаткаў, а ягоная сямʼя «карыстаецца льготамі ад ненавіснай дзяржавы».

Саранчукоў заявіў, што распаўсюджаныя тэлерадыёкампаніяй зьвесткі не адпавядаюць рэчаіснасьці, закранаюць яго гонар і дзелавую рэпутацыю. Ён патрабаваў абвергнуць іх, а таксама выдаліць сюжэт з афіцыйнага каналу гарадзенскай тэлерадыёкампаніі на сэрвісе Youtube.com.

Саранчукоў прадставіў суду 4 аркушы са здымкамі сваіх працаў, дамовы з крамай на рэалізацыю сваіх вырабаў і нават шкляны куфаль, на якім нанесены надпіс: «ГТ (Гарадзенская тэлерадыёкампанія. — РС) — ня веру».

У працэсе выступіў прадстаўнік грамадзкасьці Юры Чавусаў, дэлегаваны ў працэс рашэньнем Сойму БНФ. Ён  назваў відэасюжэт гарадзенскага тэлебачаньня прапагандысцкім. А мэтай яго, сказаў Чавусаў, было зганьбіць і прынізіць тых, хто адстойваў свае сацыяльныя правы.

— Відавочна, што мэта гэтага фільму была нанесьці шкоду Саранчукову і іншым людзям, пра якія вялася гаворка ў фільме. У фільме гавораць, што Саранчукоў ненавідзіць Беларусь, але ён прыводзіць канкрэтныя прыклады, што ня толькі любіць Беларусь, але нават спрабуе зрабіць яе лепшай. Паказальна і тое, што самі аўтары пасаромеліся прыйсьці ў судовы працэс і схаваліся за плячыма юрыста. Гэта сьведчыць пра тое, што калі ты хлусіш у такіх прапагандысцкіх сюжэтах, то ты наносіш шкоду гонару і годнасьці іншых людзей. Але потым калі твая хлусьня выкрываецца і становіцца ясна, што вы хлусы, то сытуацыя гэтых людзей незайздросная, яны самі выглядаюць ганебна і самі гэта разумеюць. Менавіта таму адказчык усялякім чынам перашкаджаў высьвятленьню аўтарства гэтай прапагандысцкай стужкі, адмаўляючыся прадставіць на запыт суду інфармацыю пра выпускаючага рэдактара, аператараў і аўтараў закадравага тэксту, які, уласна, і быў прадметам разбору.

Вадзім Саранчукоў катэгарычна не згодзен з такім рашэннем суда і мае намер абскарджваць яго ў судзе вышэйшай інстанцыі, камэнтуючы Радыё Свабода рашэньне суду, ён сказаў, што сёньня цуду не адбылося:

— У панядзелак я атрымаю рэзалюцыйную частку і тады буду думаць, што рабіць далей, бо я нават ня ведаю, на якой падставе мой пазоў не задаволены. Беларуская судовая сыстэма чарговым разам не прайшла праверку на адпаведнасьць заканадаўству. Папраўдзе, я спадзяваўся, што рашэньне будзе бліжэй да закону, але цуду не адбылося.

17 красавіка Гарадзенскае абласное тэлебачаньне паказала ў эфіры відэасюжэт «Маршам у нікуды», прысьвечаны пратэстам «недармаедаў» у Горадні. У ім згадваўся і Вадзім Саранчукоў, і іншыя актывісты гарадзенскіх дэмакратычных аб’яднанняў. Сярод іх сябра партыі «Справядлівы сьвет» Валянціна Навумава,  сябра АГП Ежы Грыгенча, каардынатар кампаніі «Гавары праўду» Зьміцер Бандарчук, сябра аргкамітэту БХД Сяргей Верамеенка і каардынатар РПГА «Рух «За свабоду» Ўладзімер Лявон. У відэа ананімны дыктар, расказваючы пра «маршы недармаедаў», сьцьвярджае, што на іх сабраліся тыя, каму «рабіць, па сутнасьці, няма чаго, як толькі маршыраваць».

Лістапад 2017
Пн Аў Сер Чц Пт Сб Ндз
« Кас    
 12345
6789101112
13141516171819
20212223242526
27282930  
© 2011 - 2017 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.