Партыя БНФ » Старшыня БНФ Рыгор Кастусёў: “У людзей давер да выбараў мінімальны”
Партыя БНФ - партыя абароны народных інтарэсаў


Старшыня БНФ Рыгор Кастусёў: “У людзей давер да выбараў мінімальны”

Дададзена 01.02.2018 12:12:22 | 611 праглядаў

У сёлетніх мясцовых выбарах удзельнічаюць чатыры так званыя першыя асобы з апазыцыйных структураў. Гэта старшыня Партыі БНФ Рыгор Кастусёў, лідэр руху «За свабоду» Юрась Губарэвіч і кіраўнікі грамадзянскай кампаніі «Гавары праўду» Андрэй Дзьмітрыеў і Тацяна Караткевіч.

Радыё Свабода пацікавілася, як праходзяць іх выбарчыя кампаніі.

kastusiouСтаршыня Партыі БНФ Рыгор Кастусёў хоча стаць дэпутатам Магілёўскага абласнога савету па месцы свайго жыхарства — у Шклоўскай гарадзкой акрузе № 54. Разам зь ім тут зарэгістраваныя яшчэ двое: намесьнік галоўнага лекара раённай бальніцы Сяргей Новікаў і рэдактар раённай газэты «Ўдарны фронт» Павал Савельеў.

31 студзеня партыйны лідэр сустракаўся з выбарнікамі на тэрыторыі свайго канкурэнта — у раённай бальніцы. На размове быў і Сяргей Новікаў.

«Ён уважліва ўсё слухаў, але пытаньняў мне не задаваў. Я яшчэ калі зьбіраў подпісы на сваё вылучэньне, зьвярнуў увагу, што ў людзей давер да выбараў мінімальны. І сёньняшняя сустрэча гэта толькі пацьвердзіла. Лекары казалі пра нізкія заробкі, пра падаражэньне харчоў і тавараў. Бачу роспач, нявызначанасьць. Але яны лічаць, што дэпутаты мясцовага роўню такіх пытаньняў ня вырашаць. Таму і інтарэсу да выбараў няма», — дзеліцца ўражаньнямі старшыня Партыі БНФ.

А вось сустрэцца з раённымі камунальнікамі, прадстаўнікамі той службы, дзе калісьці Рыгор Кастусёў працаваў сам, пакуль не выходзіць.

«Дырэктар камунслужбы сказаў, што без дазволу райвыканкаму такую сустрэчу ён праводзіць ня можа. Таму зараз іду ў адміністрацыю высьвятляць сытуацыю», — кажа кандыдат у дэпутаты абласнога савету.

Лідэр руху «За свабоду» балятуецца ў Акадэмічнай выбарчай акрузе № 48 Менску. Свой выбар Губарэвіч тлумачыць тым, што пражывае на тэрыторыі акругі. Сярод прэтэндэнтаў і намесьнік старшыні партыі «Справядлівы сьвет» Валер Ухналёў. Той кажа, што абраў менавіта гэтую акругу невыпадкова — у 2016 годзе балятаваўся тут у Палату прадстаўнікоў. Таму і цяпер ідзе там, дзе яго ведаюць.

Юрась Губарэвіч на пікеце Правацэнтрысцкай кааліцыі ў Менску, архіўнае фота

«З Ухналёвым мы нармальна паразмаўлялі. Канкураваць, натуральна, мы ня будзем. Дамовіліся, што ня будзем згадваць адзін аднаго ў нэгатыўным пляне. Мы не варагуем, шмат на што ў нас падобны погляд. Дарэчы, калі мы паглядзелі на мапу акругі, то высьветлілася, што канцэнтрацыя папярэдняй працы ў нас была на розных участках акругі. Тут мы моцна перасякацца ня будзем», — упэўнены Юрась Губарэвіч.

Акадэмічная акруга — адна з самых шчыльных у сталіцы па колькасьці кандыдатаў. Іх тут восем. Фаварытам лічаць Сяргея Казлова — дзейнага дэпутата гарсавету, дырэктара алімпійскага басэйна каля Батанічнага саду. Хоча стаць дэпутатам і дырэктар ЖЭУ № 3 Аляксей Андрэеў. Наконт яго ў Юрася Губарэвіча аптымізму няма.

«Мой дом пад ягонай адказнасьцю. І калі ён спадзяецца па нашым доме сабраць галасы ў сваю падтрымку, то наўрад ці што ў яго атрымаецца. Нараканьняў у жыхароў вельмі шмат. Яны лічаць, што камунальнікі недапрацоўваюць», — кажа ён.

Адзін з двух кіраўнікоў «Гавары праўду» Андрэй Дзьмітрыеў прэтэндуе на мандат дэпутата Менскага абласнога савету. Ён балятуецца ў Фаніпальскай акрузе № 42. Ягоныя канкурэнты: Галіна Майсейчык — дырэктарка гімназіі ў Фаніпалі, Аляксандар Саракач — старшыня Дзяржынскага райсавету дэпутатаў, Анатоль Раўнейка — бізнэсовец зь Лібэральна-дэмакратычнай партыі.

Андрэй Дзьмітрыеў, архіўнае фота

Андрэй Дзьмітрыеў, архіўнае фота

У размове са Свабодай Дзьмітрыеў сказаў, што супраць яго ўлады выставілі цяжкую артылерыю.

«У Майсейчык і Саракача, гледзячы на іх месца працы, пасады сур’ёзныя. Шмат дзе прадстаўнікі ўлады ідуць на выбары наагул без канкурэнцыі. А супраць мяне кідаюць ажно двух. Улады хочуць, каб я не прарваўся ў дэпутаты ніякім чынам», — сказаў ён.

Лідэр грамадзянскай кампаніі кажа, што ён тлумачыць выбарнікам гэтую тактыку. Маўляў, у супернікаў і без таго шмат адказнай працы. А дэпутату ў мясцовым савеце нават заробку ня плацяць. Дык навошта ім такая абуза?!

«А для мяне дэпутацтва стане важным крокам у маім жыцьці. Таму мая каманда працягвае інтэнсіўную кампанію. Мы зрабілі стаўку на абыход выбарнікаў „ад дзьвярэй да дзьвярэй“. Я таксама хаджу штодня. Адначасова зьбіраем подпісы за адкрыцьцё аўтобуснага маршруту Менск — Фаніпаль. Рэакцыя людзей мне падабаецца. Яны хочуць дэпутата маладзейшага і з новым тварам».

Кандыдатка на прэзыдэнта Беларусі падчас выбараў 2015 году Тацяна Караткевіч зарэгістраваная ў Заслаўскай выбарчай акрузе № 40 сталіцы. Для Менску тут прэтэндэнтаў няшмат. Акрамя Караткевіч, балятуюцца дырэктар «Галерэі Канцэпт» Уладзімер Хейфец і прадстаўнікі дзьвюх палітычных партый: лібэральна-дэмакратычнай — Сяргей Доўбыш і камуністычнай — Уладзімер Качура.

Тацяна Караткевіч, архіўнае фота

Караткевіч кажа «Свабодзе», што хацела б паўдзельнічаць зь імі ў дэбатах.

«Я пакінула ім свае каардынаты і сказала, што буду чакаць ад іх выхаду на сувязь. Але сёньня апошні дзень студзеня, а званкоў мне пакуль няма», — кажа Караткевіч.

30 студзеня лідэр «Гавары праўду» сустрэлася з кіраўніком адміністрацыі Цэнтральнага раёну Ігарам Бузоўскім:

«Мая акруга ў гэтым раёне. І ў мяне набралася шмат пытаньняў. Яны зьвязаныя зь зялёнай зонай на вуліцы Заслаўскай, якую мы разам з выбарцамі хочам ператварыць у сквэр. І з шэрагам двароў, дзе патрэбна новае абсталяваньне. І з рухам машын у дварах, з асьвятленьнем вуліц. Мае выбарнікі просяць найперш вырашаць жыцьцёвыя праблемы», — тлумачыць свой паход да раённага начальніка Тацяна Караткевіч.

  • Алекс. Саскевич

    ? ПОЧЕМУ ОППОЗИЦИЯ НЕ ЖЕЛАЕТ ПРИНИМАТЬ УЧАСТИЕ В ПОДГОТОВКЕ И ПРОВЕДЕНИИ РЕФЕРЕНДУМА ??? https://www.youtube.com/watch?v=eMv1qPr0QvA + Вопросы : 1. ” Гражданин Беларуси, имеет право быть избранным, на оду и ту же должность, не более чем два раза “. 2. “Конституция Беларуси не может регулироваться никакими дополнительными законами или указами”. ! ЛЮБЫЕ ОЧЕРЕДНЫЕ ВЫБОРЫ, БЕЗ ЭТОГО ИЗМЕНЕНИЯ В НАШЕЙ ДЕМОКРАТИЧЕСКОЙ КОНСТИТУЦИИ, БУДУТ БЕЗ АЛЬТЕРНАТИВЫ. ДИРЕКТОРА ОАО. ПРЕДСЕДАТЕЛИ СПК. ПРЕДСЕДАТЕЛИ ИСПОЛКОМОВ. ПРЕЗИДЕНТ. ВСЕ ОНИ ИЗБИРАЮТСЯ СВОИМИ ПОДЧИНЁННЫМИ. ПРИВЕДИТЕ ПАРУ ПРИМЕРОВ ГДЕ НА ВЫБОРАХ НАРОД ИХ ЗАМЕНИЛ. ТАКУЮ ВОЗМОЖНОСТЬ ДАЁТ ВОЗВРАЩЕНИЕ В КОНСТИТУЦИЮ ВСЕГО ЛИШЬ ОДНОГО ПУНКТА : Гражданин Беларуси, имеет право быть избранным на одну и туже должность не более двух раз. // И конец нашим спорам и разногласиям. // https://www.youtube.com/watch?v=qN3dbD_lm3s

Лістапад 2018
Пн Аў Сер Чц Пт Сб Ндз
« Кас    
 1234
567891011
12131415161718
19202122232425
2627282930  
© 2011 - 2018 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.