Партыя БНФ » Аргкамітэт 25 сакавіка: апазыцыя плянуе вялікі канцэрт з Вольскім і Міхалком на Дзень Волі
Партыя БНФ - партыя абароны народных інтарэсаў


Аргкамітэт 25 сакавіка: апазыцыя плянуе вялікі канцэрт з Вольскім і Міхалком на Дзень Волі

Дададзена 01.02.2018 12:21:07 | 134 праглядаў

Прадстаўнікі аргкамітэту сьвяткаваньня сотых угодкаў Беларускай Народнай Рэспублікі — сустаршыня БХД Павал Севярынец, сябра Сойму Партыі БНФ Ігар Лялькоў, прадстаўнік Эўрабеларусі Яўген Афнагель — у жывым эфіры Радыё Свабода расказалі пра хаду падрыхтоўкі да адзначэньня юбілею.

Паводле Паўла Севярынца, знакавая гадавіна аб’яднала апазыцыю — бадай, упершыню за апошнія 10-15 гадоў. Цяпер стаіць задача далучыць да кампаніі дзяржаўных чыноўнікаў, якія таксама мусяць усьвядоміць значнасьць БНР для сёньняшняй беларускай дзяржавы.

Як удакладніў Яўген Афангель, аргкамітэт гатовы да перамоваў з уладамі. Паводле яго, калі кіраўнікі прэзыдэнцкай адміністрацыі ў асобах Качанавай, Рыжанкова ды іншых пацьвердзяць такое жаданьне, усе будуць толькі радыя. Але пакуль ніхто са службоўцаў сваіх плянаў не агучыў.

Раней грамадзкія актывісты Ўладзімер Падгол і Алесь Таўстыка апублікавалі ліст, у якім заклікалі Аляксандра Лукашэнку ня толькі далучыцца да сьвяткаваньня, а і выступіць у якасьці спікера агульнанацыянальнай дыктоўкі. На іх думку, тэкст мае быць скампанаваны з Устаўных грамат БНР.

«Калі Лукашэнка зачытае Ўстаўную грамату БНР на беларускай мове, на „тарашкевіцы“, то чаму б не? Маральна мы гатовыя», — пракамэнтаваў ініцыятыву Павал Севярынец.

Калі будзе вядома, ці дазволяць менскія ўлады шэсьце і канцэрт на Дзень Волі 25 сакавіка? Адзін з заяўнікаў акцыі Ігар Лялькоў выказаў спадзяваньне, што сёлета рашэньне ня будзе прымацца, як у ранейшыя гады. Згодна з заканадаўствам, адказ мусіць быць дадзены не пазьней, чым за пяць дзён да падзеі. Праўда, летась гэта здарылася ледзь не напярэдадні, што ў выніку прывяло да гвалту з боку спэцназу і масавых арыштаў.

Павал Севярынец у сваю чаргу расказаў, што плянуецца ня проста шараговае шэсьце. Вядучыя мастакі суполкі «Пагоня», дызайнэры цяпер працуюць над афармленьнем спадарожнага антуражу. Афіцыйная назва — «Сьвята Незалежнасьці».

Наяўнасьць пляну «Б» на выпадак, калі ўлады не дазволяць сьвяткаваць 100-годзьдзе незалежнасьці БНР у цэнтры сталіцы, чальцы аргкамітэту раскрываць ня сталі. Паход на плошчу Бангалор, куды звычайна выпраўляюць мітынгаваць апазыцыю, не разглядаецца. Толькі плян «А», удакладнілі яны. Адзінае, сказалі, што будуць зробленыя дзьве юрыдычныя спробы.

Фінальнай часткай мусіць стаць вялікі канцэрт пад адкрытым небам на плошчы Свабоды, дзе некалькі апошніх гадоў ладзяцца масавыя культурна-відовішчныя імпрэзы. Паводле прадстаўнікоў аргкамітэту, запрашэньне выступіць са сцэны ўжо атрымалі ці яшчэ атрымаюць знакавыя артысты — Лявон Вольскі, Сяргей Міхалок ды іншыя.

Падсумоўваючы свае пляны, прадстаўнікі аргкамітэту заявілі, што ў першую чаргу працуюць над тым, каб улады прынялі прапанаваны сцэнар у поўным аб’ёме.

Паводле Радыё Свабода

 

 

 

 

Люты 2018
Пн Аў Сер Чц Пт Сб Ндз
« Сту    
 1234
567891011
12131415161718
19202122232425
262728  
© 2011 - 2018 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.