Выбарчая камісія выдаліла са зьвестак пра Кастусёва факт старшынства ў БНФ

Шклоўская акруговая выбарчая камісія № 54 выкрасьліла некаторыя зьвесткі зь біяграфіі кіраўніка Партыі БНФ Рыгора Кастусёва, якая павінна была разьмяшчацца на выбарчых стэндах і ўлётках. Рыгор Кастусёў балятуецца ў дэпутаты Магілёўскага абласнога Савета дэпутатаў па Шклоўскай выбарчай акрузе №54.

– перадае Радыё “Свабода”.

З інфармацыі пра кандыдата было выкрасьлена тое, што Кастусёў жыве ў Шклове, што ён старшыня Партыі БНФ і прымаў удзел у стварэньні праграмы па рэфармаваньні жыльлёва-камунальнай гаспадаркі Беларусі.

Старшыня Шклоўскай выбарчай камісіі Аляксандар Гурынаў патлумачыў Кастусёву прычыны выдаленьня гэтай інфармацыі тым, што яна не адносіцца да выбараў.

Рыгор Кастусёў сказаў Радыё Свабода, што пры падачы інфармацыі ў выбарчай камісіі ня ўзьнікла пытаньняў ні да яе аб’ёму, ні да саміх фактаў. На думку Кастусёва, інфармацыю выкрасьлілі без узгадненьня зь ім, каб прынізіць «значнасьць дасягненьняў» у параўнаньні зь іншымі кандыдатамі.

Цяпер старшыня Партыі БНФ рыхтуе скаргу ў Магілёўскую абласную камісію, Цэнтравыбаркам і пракуратуру.