Партыя БНФ » У Чырвоным касьцёле прайшла імша па забітых і катаваных
Партыя БНФ - партыя абароны народных інтарэсаў


У Чырвоным касьцёле прайшла імша па забітых і катаваных

Дададзена 05.09.2020 12:02:56 | 200 праглядаў

5 верасьня ў менскім касьцёле Сьвятых Сымона і Алены, які вядомы як Чырвоны касьцёл, адбылася імша за пацярпелых, забітых і зьняволеных на мірных акцыях пратэсту ў Беларусі.

Чырвоны касьцёлБольш за тысячу чалавек прыйшло ўвечары 5 верасня ў сталічны Чырвоны касцёл на малітву за пацярпелых, забітых і зьняволеных падчас мірных акцый пратэсту. Не ўсе зьмясціліся ўнутры, некаторыя слухалі службу на ганку, на тэрыторыі вакол касцёла і плошчы Незалежнасьці - паведамляе Беларускае Радыё Рацыя.

Да імшы духоўна далучыліся яшчэ каля некалькі тысяч вернікаў, якія глядзелі онлайн-трансьляцыю набажэнства на партале Catholic.by.

Падчас службы з плошчы Незалежнасьці чуліся папярэджаньні «аб незаконнасьці ўдзелу ў масавым мерапрыемстве», былі падагнаныя аўтазакі.

Пакуль арцыбіскуп Тадэвуш Кандрусевіч знаходзіцца ў выгнаньні і праз антыканстытуцыйныя і цалкам незаконныя перашкоды ў боку ўладаў Беларусм ня мае магчымасьці вярнуцца на радзіму, генэральны вікарый Юры Касабуцкі ажыцьцяўляе пастырскае кіраўніцтва Менска-Магілёўскай архідыяцэзіяй.

У прамоўленай гаміліі ён нагадаў, якія жудасьці давялося перажыць многім удзельнікам мірных акцый у розных месцах Беларусі і што некаторыя ўжо ніколі ня вернуцца дадому.

«Даруй нам, Божа, за тое, што на нашай зямлі хтосьці загінуў, бо гэта трагедыя ўсяго нашага народу!», — сказаў герарх, дадаўшы, што людзі загінулі толькі за тое, што хацелі праўды і справядлівасьці.

«Трагедыя народу, якая цяпер адбываецца ў нашай краіне, паказала нам, хто ёсьць хто. Але як гэтая трагедыя, гэты крызіс аб’яднаў людзей. На нас ціснуць, але мы самі становімся іншымі. Шляху назад няма. Але ёсьць шмат дабра для кожнага з нас. Гэта наша салідарнасьць».

Юры Касабуцкі расказаў, якімі жахлівымі сьведчаньнямі зь ім дзяліліся людзі, што перажылі зьдзекі і катаваньні на Акрэсьціна і ў іншых месцах зьняволеньня. Пры гэтым біскуп падкрэсьліў, што фізычныя раны, нават цяжкія, загояцца, але найбольш страшныя наступствы псыхалягічнай траўмы.

«Мы, беларусы, заўсёды былі мірнымі людзьмі, міралюбнымі. Заўсёды жылі ў згодзе, але ў нас сеюць гэтую нянавісьць, сеюць злосьць у нашыя сэрцы. Мы асабліва молімся за ўсіх людзей, якія пацярпелі ад гвалту: за тых студэнтаў, якіх жудасна хапалі, скручвалі; за дзяўчыну, якую цягнулі за валасы. Кожны зь іх атрымлівае псыхалягічную траўму, зь якой трэба будзе жыць», — сказаў біскуп Юрый Касабуцкі.

Гаворачы пра выгнаньне арцыбіскупа Тадэвуша Кандрусевіча і абвінавачаньні ў яго адрас, што ён «улез у палітыку», біскуп задаў рытарычныя пытаньні.

«Калі мы кажам, што выступаем супраць гвалту — гэта палітыка? Калі кажам, што выступаем супраць катаваньняў — гэта палітыка? Калі молімся кожны дзень, каб ніколі не было ў нашай краіне чагосьці падобнага — гэта палітыка? Калі мы кажам, што хочам жыць у праўдзе, у сумленнасьці, у добразычлівасьці, — гэта палітыка? Мы ня лезем у палітыку: мы проста молімся за ўвесь народ без выключэньня», — сказаў ён.

Ад імя Менска-Магілёўскага Мітрапаліта Тадэвуша Кандрусевіча біскуп Юрый Касабуцкі шчыра падзякаваў усім удзельнікам малітвы. Ён аддаў нізкі паклон беларускім жанчынам, якія з кветкамі ў руках зьдзейсьнілі геройскі ўчынак, выйшаўшы на вуліцы з пасланьнем міру.

Прамову сьвятара прысутныя сустрэлі авацыяй.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Верасень 2020
Пн Аў Сер Чц Пт Сб Ндз
« Жні    
 123456
78910111213
14151617181920
21222324252627
282930  
© 2011 - 2020 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.