“Спыніць паўзучы дэмантаж беларускай дзяржаўнасьці!” – заява паліткамісіі БНФ

Заява палітычнай камісіі Партыі БНФ датычна ацэнкі бягучай сытуацыі ў Беларусі

Паліткамісія Партыі БНФ, грунтуючыся на сваіх ранейшых ацэнках вынікаў выбараў прэзыдэнта, выказвае надзвычайную трывогу з прычыны цяперашніх палітычных працэсаў у краіне. Праз гвалтоўныя дзеяньні і шэраг небясьпечных крокаў у галіне ўнутранай і зьнешняй палітыкі цяперашніх уладаў складаецца сытуацыя, якая ёсьць сьмяротна небясьпечнай для самога існаваньня Рэспублікі Беларусь як незалежнай дзяржавы беларускага народа, для саміх падмуркаў беларускай дзяржаўнасьці.

Кіруючая цяпер групоўка (Лукашэнка і ягонае найбліжэйшае атачэньне) фактычна супрацьпаставіла сябе беларускаму народу – гаворыцца ў заяве

У апошні час рэжым Лукашэнкі зрабіў наступныя крокі на гэтым небясьпечным шляху:

• Праваахоўныя органы былі ператвораныя ў карныя структуры, асноўнай задачай якіх замест аховы правапарадку зробленыя палітычныя рэпрэсіі і застрашэнmне насельніцтва, пра што адкрыта гавораць кіраўнікі гэтых структур.
• У краіну запрошаныя сілавыя структуры Расейскай Федэрацыі, а Крэмль выказаў гатоўнасьць кінуць на задушэньне пратэстаў беларускага народа сваіх карнікаў.
• Рэжым вядзе перамовы пра ўмовы далейшага пашырэньня знаходжання ў Беларусі расейскіх вайсковых аб’ектаў (верагодна – у абмен на палітычную і эканамічную падтрымку).
• У палітычную барацьбу ўключаныя ўзброеныя сілы.
• Кіраваньне народнай гаспадаркай фактычна пераведзенае на вайсковыя рэйкі..
• Улады мэтанакіравана праз абмежаваньне інтэрнэт-камунікацый, рэпрэсіі і крымінальныя справы выціскаюць з краіны прадпрыемствы сектара IT, разбураючы адзін з найбольш пасьпяховых кампанентаў беларускай эканомікі.
• Нечуваны ціск і рэпрэсіі абрынуліся на беларускія СМІ і журналістаў, пры гэтым вядзецца сьвядомая палітыка на замяшчэньне нацыянальных сродкаў масавай інфармацыі расейскімі, у тым ліку праз запрашэньне на беларускія тэлеканалы расейскіх спецыялістаў.
• Растаптаўшы грамадзянскія і палітычныя правы беларусаў, улады адкрыта ідуць на новыя парушэньні таксама і сацыяльна-эканамічных правоў, а кампанія задушэньня страйкавага руху вядзецца пад адкрыта антыбеларускімі лёзунгамі і суправаджаецца адрасаванымі працоўным заклікамі шукаць сабе іншую краіну; запрашаюцца штрэйкбрэхеры, страйкоўцаў арыштоўваюць і звальняюць.
• Узмоцнены дэсант расейскіх прапагандыстаў праз дзяржаўныя сродкі масавай інфармацыі і ідэалагічную вертыкаль адданых Лукашэнку службоўцаў распачаў кампанію распальваньня варажнечы ў беларускім грамадзтве, што сутыкаецца з патураньнем з боку ўлады.
• Распачаты ціск на каталіцкі касьцёл і праваслаўных гіерархаў.
• Расейскія прапагандысты ізноў укідваюць у беларускае грамадзтва лёзунгі пра супрацьпастаўленьне “чырвона-зялёных” і “бела-чырвона-белых”, нацкоўваючы беларусаў адзін на аднаго. З самых таемных скрыняў рэжыму выцягнутыя старыя тэзы дзеля распальваньня моўнай варажнечы паміж беларусамі.

У сукупнасьці азначаныя фактары ствараюць сьмяротную пагрозу для нацыянальнай бясьпекі Беларусі і шкодзяць устойлівасьці беларускай дзяржаўнасьці.

Асабліва небясьпечным гэтае становішча зьяўляецца ў сьвятле дэкляраванай рэжымам гатоўнасьці да далейшых крокаў у падпарадкаваньні Маскве. Выклікае трывогу намер Лукашэнкі разгарнуць перамовы пра “паглыбленую інтэграцыю” ужо ў найбліжэйшым часе разам з ягонымі запытамі па дадатковую эканамічную і палітычную падтрымку з Усходу. Гэта можа сьведчыць пра ягоны разьлік захаваць кантроль над краінай праз пераўтварэньне Рэспублікі Беларусь у пратэктарат Масквы, захаваўшы за сабой статус непрызнанага беларускім народам але прызначанага Масквой начальніка.

У сытуацыі гэткай небясьпечнай пагрозы Партыя БНФ лічыць неабходным заявіць пра падтрымку народнага руху, які разгортваецца цяпер ў форме пратэстаў па ўсёй краіне.

Партыя БНФ ад імя ўсіх нацыянальна-дэмакратычных сілаў заяўляе, што цяпер няма іншага шляху апроч перамоваў для выхаду з гэтага палітычнага крызысу – толькі гэта можа прадухіліць сьмяротную небясьпеку, якая навісла цяпер над беларускай дзяржавай.

Разам з тым БНФ рашуча асуджае любыя спробы заахвоціць вонкавае ўмяшальніцтва ў сітуацыю ў Беларусі, лічачы асабліва небясьпечнымі заклікі да расейскай падтрымкі, ад каго б яны не сыходзілі. Увядзеньне расейскіх сілаў у вырашэньне ўнутрыбеларускага канфлікту зьяўляецца недапушчальным. Мы заклікаем усе палітычныя сілы адмовіцца ад гэткіх правакацыйных ініцыятываў і заклікаў.

У мэтах прадухіленьня грамадзянскай вайны, замежнай інтэрвенцыі і страты незалежнасьці краіны БНФ заклікае да агульнацыянальнага дыялёгу з удзелам шырокага кола ўсіх адказных грамадзка-палітычных структураў дзеля выратаваньня краіны.

Перадумовай для дыялёгу з’яўляецца вызваленьне палітвязьняў і спыненьне крымінальных справаў, распачатых у дачыненьні да ўдзельнікаў выбарчай кампаніі і пратэстоўцаў.