БНФ: “Праз перарэгістрацыю партый рэжым расчышчае поле для прарасейскіх сілаў”

На сустрэчы са сваімі нешматлікімі прыхільнікамі 16 верасня Аляксандр Лукашэнка даручыў Міністэрству юстыцыі правесці перарэгістрацыю палітычных партый. Намесьнік старшыні Партыі БНФ Аляксей Янукевіч разглядае гэтую дэклярацыю як намер замест беларускіх палітычных партый пабудаваць у Беларусі асяроддзе для філіяў расейскіх палітычных партый, якія будуць апірышчам узурпатара.

Лукашэнка нагадаў, што ў Мінюсце зарэгістравана 15 партый. “Але мы ж разумеем, што гэта не партыі, калі дзесяць з іх адхіліліся ад сваіх статутаў, задач і патрабуюць новых выбараў, — цытуе Лукашэнку яго прэс-служба. — Міністру юстыцыі даручаю старанна паглядзець на ўсе партыі — ці адпавядаюць яны патрабаванням па колькасці , структуры, ці працуюць па сваім статуце. Трэба правесці іх перарэгістрацыю”.

Перарэгістрацыя партыі ў сённяшніх умовах – гэта фактычна пагроза іх ліквідацыі, лічыць намеснік старшыні Партыі БНФ Алексей Янукевіч:

— Натуральна, Партыя БНФ дзейнічае ў адпаведнасьці са сваім статутам і адпавядае патрабаваньням існуючага, вельмі неспрыяльнага для дзейнасьці палітычных партыяў, заканадаўства. І па колькасьці сябраў, і па наяўнасьці структураў. Нас даволі пільна ўсе папярэднія гады адсочвае Мінюст, мы штогод накіроўваем справаздачы. Я перакананы, дарэчы, што праўладныя партыі, што падпісалі зварот, сапраўды маюць праблемы па названых Аляксандрам Лукашэнкам крытэрах і могуць быць ліквідаваныя за недастатковую лаяльнасьць. Што да Партыі БНФ, іншых апазыцыйных партыяў – мы бачым і разумеем, што закон цяпер дзейнічае вельмі выбарачна, і абараніцца ад магчымых дзеяньняў Мінюсту ў судох будзе проста нерэальна. Пагрозы ліквідацыі Партыі БНФ могуць быць як часткай татальнай зачысткі грамадзка-палітычнага поля, так і элемэнтам магчымых дамоўленасьцяў з Масквой аб будучай канстытуцыйнай рэформе, каб расчысьціць шлях для прарасейскіх партыяў у Беларусі, — сказаў намесьнік старшыні Партыі БНФ Аляксей Янукевіч у камэнтары беларускаму парталу TUT.BY.

Паводле слоў Лукашэнкі, да прыняцця новай Канстытуцыі “трэба вярнуцца да партыйнай сістэмы, прайсціся па законе аб палітычных партыях”. “Давайце спакойна займацца гэтай працай. Вялікая справа не робіцца прыхапкам, яна павінна выспець. Раней мы не займаліся сур’ёзна партыйным будаўніцтвам. Не было запыту на партыі”, — адзначыў ён.

Як паведамляе інфармацыйная агенцыя Белапан, Лукашэнка лічыць, што сучаснае грамадства “структуруецца і яно павінна мець свае палітычныя арганізацыі, уключаючы партыі”. “Ужо даўно ідзе праца над новым законам [аб палітычных партыях], але патрэбен вынік”, — заявіў ён.

На круглым стале 10 верасня прадстаўнікі 10 з 15 зарэгістраваных у Беларусі палітычных партый прынялі агульную рэзалюцыю, у якой асудзілі гвалт, а таксама заклікалі да дыялогу і правядзення новых прэзідэнцкіх выбараў.

Сярод партый, прадстаўнікі якіх падпісалі рэзалюцыю, ёсць як апазіцыйныя, так і праўладныя партыі: Беларуская сацыяльна-спартыўная партыя, Беларуская сацыял-дэмакратычная партыя (Грамада), Рэспубліканская партыя, Аб’яднаная грамадзянская партыя, Беларуская партыя левых “Справядлівы свет”, Партыя БНФ, Беларуская партыя “Зялёныя” , Рэспубліканская партыя працы і справядлівасці, партыя “Беларуская сацыял-дэмакратычная Грамада” і Сацыял-дэмакратычная партыя народнай згоды.

Прадстаўнікі партый запатрабавалі ад дзяржорганаў і службовых асоб “прыняць вычарпальныя меры па спыненні гвалту ў адносінах да грамадзян, якія рэалізуюць сваё канстытуцыйнае права на мірныя пратэсты, і неадкладна вызваліць усіх затрыманых, распачаць крымінальныя справы па фактах забойстваў, катаванняў, збіванняў, адвольных затрыманняў для наступнага прыцягнення да адказнасці вінаватых”.

“Прапаноўваем органам дзяржаўнай улады арганізаваць дыялог з прадстаўнікамі ўсяго спектра грамадска-палітычных сіл Беларусі па пытанні правядзення на працягу найбліжэйшых 6 месяцаў новых выбараў прэзідэнта Рэспублікі Беларусь”, — гаворыцца ў рэзалюцыі.

Акрамя таго, удзельнікі круглага стала заснавалі пастаянна дзеючую нараду палітычных партый.