Намесьнік старшыні БНФ Аляксей Янукевіч: “Маршы набліжаюць перамены”

Намеснік старшыні Партыі БНФ Аляксей Янукевіч сказаў у каментары СМІ, што ўнутранае напружанне ў сістэме ўлады павялічваецца з кожным нядзельнымі маршам.

Такім чынам палітык адказаў на пытаньне датычна таго, якія вынікі мае беспрэцэдэнтная грамадская актыўнасць беларусаў.

«Цвёрда перакананы, што гэтыя маршы не марныя нягледзячы на ​​тое, што няма бачнай рэакцыі з боку ўладаў: калі казаць не пра рэпрэсіі, а саступкі і гатоўнасці да дыялогу. Тым не менш, вулічная актыўнасць з’яўляецца важным фактарам, які набліжае перамены. Так, яны могуць наступіць ня хутка. Прадказаць складана, але патэнцыйны тэрмін – паўгода», – сказаў Аляксей Янукевіч.

Палітык удакладніў, што перамены – гэта натуральны працэс, які немагчыма штучна паскорыць:

«Цяпер у многіх захапленне кыргызскімі падзеямі, аднак я лічу, што той шлях хутчэй адсунуў б перамены ў нашай краіне. Тая маналітная дзяржаўная сістэма, што будавалася два дзесяткі гадоў, у выніку сілавога супрацьстаяння будзе толькі кансалідавацца і ўзмацняцца. Працяглы мірны пратэст – я разумею, што гэта цяжка ў эмацыйным плане – наўпрост вядзе да станоўчых пераменаў», – мяркуе Янукевіч.

Ён падкрэсліў, што масавыя маршы таксама важныя, каб да падзеяў у Беларусі не падала цікавасць міжнароднай супольнасці, а сярод дэманстрантаў не было упадніцкіх настрояў.

Прэзідэнцкія выбары прайшлі ў Беларусі 9 жніўня. Найбольш папулярным апанентам Аляксандра Лукашэнкі – Віктару Бабарыка і Валерыю Цапкала – ня дазволілі ўдзельнічаць у выбарчай кампаніі ў якасці кандыдатаў у прэзідэнты. Іх штабы аб’ядналіся вакол Святланы Ціханоўскай. Паводле афіцыйных дадзеных, за Лукашэнку прагаласавалі 80,1 працэнта выбаршчыкаў, за яго асноўную суперніцу – 10,1 працэнта. Нязгода з вынікамі ЦВК вывела на вуліцы беларускіх гарадоў дзесяткі тысяч чалавек. Беспрэцэдэнтны гвалт у дачыненні  іх вывеў на вуліцы ўжо сотні тысяч.