100 гадоў Слуцкаму Збройнаму Чыну: заява БНФ да Дня Герояў

100 гадоў Слуцкаму Збройнаму Чыну

Заява Партыі БНФ да Дня Герояў 2020

7 лістапада 2020 г.

Сто гадоў таму, 27 лістапада 1920 году, распачаўся Слуцкі Збройны Чын. У гэты дзень нашыя продкі выступілі на змаганьне за сваю дзяржаву – Беларускую Народную Рэспубліку.

У бой рушылі Слуцкі і Грозаўскі палкі Першай Слуцкай Брыгады Стралкоў БНР.

«Тым, што пайшлі паміраць, каб жыла Бацькаўшчына» – з гэтымі словамі, вышытымі на бела-чырвона-белых штандарах, простыя хлопцы са Случчыны пайшлі ў бой супраць добраўзброеных акупантаў. Гэты гераічны збройны чын случчакоў тады засьведчыў і расейскім бальшавікам, і ўсяму астатняму сьвету:

беларусы гатовыя змагацца за сваю незалежнасЬць!

Паўстанцы на працягу месяца давалі адпор бальшавіцкай навале з Усходу. Апошнія атрады случчакоў сышлі з поля бітвы толькі ў студзені 1921 году. Партызанскія атрады працягвалі змаганьне яшчэ некалькі гадоў.

Яны змагаліся за свабоду сваю і Айчыны! Яны не чакалі ні ад каго дапамогі!

Яны самі вырашалі свой лёс! Яны паклалі свае жыцьці за Беларусь, за нас, за цябе!

Беларуская дзяржава нараджалася ў крывавых пакутах, і наш беларускі вольны дух, які тады ажыў, не згасаў больш аніколі. На поле барацьбы за случчакамі выходзілі і выходзяць наступныя пакаленьні змагароў за Беларусь.

Героі назаўсёды застануцца ў нашай памяці. Слуцкія паўстанцы ішлі змагацца зь верай у сваю праўду, бо ведалі, што няма большай каштоўнасьці ў чалавека за волю сваю і свайго народу.

Узгадайма сёньня гераізм нашых продкаў і выкажам ім з глыбіні сэрца ўдзячнасьць беларускага народу за іхны яскравы чын.

ЖЫВЕ БЕЛАРУСЬ!

ВЕЧНАЯ ПАМЯЦЬ ГЕРОЯМ СЛУЦКАГА ЗБРОЙНАГА ЧЫНУ!