Старшыня БНФ Рыгор Кастусёў абвінавачвае Лукашэнку ў мааізме

Старшыня Партыі БНФ Рыгор Кастусёў – пра сход чыноўнікаў рэжыму, які рыхтуецца неўзабаве ў Менску пад шыльдай гэтак званага “усебеларускага народнага сходу”:

- Праглядаючы разнастайныя рэакцыі сяброў па фэйсбуку з ацэнкамі надыходзячага т.з. Усебеларускага народнага сходу (УНС), хачу выказаць свае меркаванні і ўспрыняццё гэтага мерапрыемства.

УНС мне нагадвае не з’езд КПСС часоў Савецкага Саюза, а больш – з’езд Кампартыі Кітая пад кіраўніцтвам “вялікага кормчага” Маа Цзэдуна.

Бо і паводзіны беларускага чынавенства, гатовага выканаць любы капрыз А.Лукашэнкі, нагадваюць больш паводзіны падначаленых былога кіраўніка КПК.

Беларускае чынавенства заўсёды гатовае выконваць любое не прадуманае распараджэнне Лукашэнкі, як гэта было з укладаннем фінансавых сродкаў у сельскую гаспадарку, у дрэваперапрацоўку, у прадпрыемствы па вытворчасці цэменту, што ў выніку прывяло да вялікіх фінансавых стратаў для краіны.

Калі раптам Лукашэнка загадае, як гэта было ў Кітаі па загадзе Маа Цзэдуна, будаваць доменныя печы па вытворчасці сталі і чугуна на сялянскіх агародах, беларускія чыноўнікі возьмуцца за выкананне і гэтага распараджэння. Або, як распарадзіўся ў свой час Маа, возьмуцца і за знішчэння вераб’ёў для павышэння ўраджайнасці зернявых культур.

На 6-ы УНС запрошаны, нават, лідар Кампартыі РФ Зюганаў і іншыя замежныя госці, якія плануюць прыняць удзел у мерапрыемстве.

А.Лукашэнку вельмі хацелася, каб ва УНС прынялі ўдзел і кіраўнікі апазіцыйных партый Беларусі, якія таксама атрымалі запрашэнні, за выключэннем старшыні АГП М.Казлова і старшыні партыі “Зялёныя” З.Кучука. Але, згодна рашэнняў кіруючых органаў, кіраўнікі партый БНФ, СС, БСДП Г, БСДГ адмовіліся ад удзелу ва УНС.

Так што ў уладаў Беларусі не атрымаецца ператварыць УНС ў падобнасць такой “пляцоўкі для агульнанацыянальнага дыялога” як быў з’езд КПК часоў Маа.