Ператрус у сядзібе Рыгора Кастусёва, была затрыманая яго дачка Кацярына

У аўторак, 16 лютага, адбыўся ператрус ў бацькоўскай хаце старшыні Партыі БНФ Рыгора Кастусёва ў вёсцы Цяхцін Бялыніцкага раёну. Была затрыманая і дастаўленая ў Магілёў дачка лідэра БНФ Кацярына Кастусёва (пасьля ператрусу ў магілёўскай кватэры – вызваленая).

«Толькі што даведаўся, што магілёўская пракуратура затрымала маю дачку Кацярыну. Яны з маёй жонка Ларысай былі на вёсцы: Цяхцін, Бялыніцкі раён. Прыехалі на вёску, правялі там вобшук, затрымалі дачку і паехалі на Магілёў. Пры вобшуку нічога не забралі», – напісаў Рыгор Кастусёў у фэйсбуку.

Як пазьней стала вядома, ператрус зладжаны ўпраўленьнем па барацьбе з арганізаванай злачыннасьцю і карупцыяй (ГУБАЗіК). Рыгор Кастусёў знаходзіцца зараз у Шклове. Падчас вобшуку ў Цяхціне прысутнічалі яго жонка Ларыса і дачка Кацярына.

Перад пачаткам ператрусу, як распавяла жонка палітыка Ларыса, следчыя папрасілі выдаць «зброю, забароненую літаратуру і наркотыкі», калі гэта маецца на доме. Падчас ператрусу нічога падобнага не выявілі.

Неўзабаве Кастусёў паведаміў, што ў кватэры дачкі ў Магілёве таксама прайшоў ператрус і гэта звязана з сённяшняй хваляй ператрусаў у праваабаронцаў. Яе адпусцілі.

Па словах Кацярыны, супрацоўнікі праваахоўных органаў заявілі ёй, што яна з’яўляецца валанцёрам ПЦ “Вясна”.Што шукалі праваахоўнікі, Кацярына так і не зразумела. Яна кажа, што вобшукі праводзіліся у межах нейкай крымінальнай справы, але якую яна мае датычнасць да гэтай справы, ёй так і не патлумачылі. Гутарылі з жанчынай супрацоўнікі магілёўскага ГУБАЗіК – паведамляе рэгіянальны сайт 6tv.by.

Зараз Кацярына Кастусёва знаходзіцца дома ў сваёй кватэры ў Магілёве.

Кацярыне 37 гадоў, яна скончыла Акадэмію музыкі, выкладала ў магілёўскай школе музыкі. Пасля прэзідэнцкіх выбараў 2010 года яе звольнілі. Цяпер жанчына працягвае займаецца любімай справай, працуе ў адным з дзіцячых цэнтраў Магілёва, паведамляе nn.by.

Атака на радавую сядзібу Кастусёвых сталася часткай маштабнага рэйду супраць арганізацыяў грамадзянскай супольнасьці, правабаронцаў і журналістаў, які пракаціўся ў гэты дзень па ўсёй краіне. Лік людзей, якія трапілі пад гэтую хвалю, ужо ідзе на дзясяткі.

З самай раніцы міліцыя прыйшла, каб правесьці ператрусы, у офіс Беларускай асацыяцыі журналістаў, на кватэры яе кіраўнікоў, да журналістаў, правабаронцаў з цэнтру “Вясна”, прадстаўнікоў незалежных прафсаюзаў па ўсёй краіне. Сярод тых, хто патрапіў пад удар – сябры Партыі БНФ, якія ажыццьяўляюць законную правабарончую дзейнасьць: Валер Пуціцкі з Рэчыцы, Алена Масьлюкова з Сьветлагорску, Аляксей Колчан з Магілёву ды іншыя. 

Да каго сілавікі прыйшлі зь ператрусамі.

Журналісты

• Ператрус у офісе Беларускай асацыяцыі журналістаў
• Алег Агееў (Менск, намесьнік старшыні БАЖ)
• Андрэй Бастунец (Менск, старшыня БАЖ, ператрус у офісе БАЖ і кватэры сына — Арсенія Бастунца)
• Алесь Буракоў — малодшы (Магілёў)
• Алесь Буракоў — старэйшы (Магілёў)
• Барыс Гарэцкі (Менск, намесьнік старшыні БАЖ)
• Анатоль Гатоўчыц (Гомель)
• Яўген Меркіс (Гомель, забралі кампутар брата і бацькі, тэлефоны)
• Аляксандар Райкон (Магілёў)
• Крысьціна Рыхтэр (юрыстка, забралі тэлефон, дакумэнты, датычныя БАЖ, ператрус праводзілі паводле крымінальнай справы за парушэньне грамадзкага парадку (арт. 342 КК)
• Ларыса Шчыракова (Гомель)

Праваабаронцы і актывісты

• Ператрус у офісе праваабарончага цэнтру «Вясна» ў Менску
• Ганна Багдановіч (Берасьце)
• Кацярына Бажко (Берасьце)
• Барыс Бухель (Магілёў)
• Уладзімер Вялічкін (Берасьце)
• Мікалай Кванталіяні (экспэрт у лічбавай бясьпецы)
• Уладзімер Кацора (Гомель, лідэр грамадска-палітычнага цэнтру «Палеская, 52»)
• Аляксей Колчын (Магілёў)
• Алена Масьлюкова (Сьветлагорск, старшыня філіі «Вясны»)
• Ільля Міронаў (Гомель. Ільля займаецца дапамогай тым, хто трапіў пад палітычны перасьлед. У яго забралі тэхніку і тэлефоны)
• Андрэй Палуда (каардынатар кампаніі «Праваабаронцы супраць сьмяротнага пакараньня ў Беларусі»)
• Яўгенія Парашчанка (прэсавая сакратарка Беларускага дому правоў чалавека імя Барыса Звозкава)
• Зьміцер Салаўёў (Менск, забралі тэлефон і ўсю тэхніку)
• Натальля Сацункевіч (Менск)
• Андрэй Стрыжак (Рэчыца, ператрус у бацькоў, праводзіў Аддзел барацьбы з эканамічнай злачыннасьцю, забралі цьвёрды дыск і мабільны тэлефон)
• Валер Сьляпухін (Гомель, ператрус у бацькоў, сам ён зьехаў за мяжу ад палітычнага перасьледу)
• Ірына Трацьцякова (Віцебск, ператрус у бацькоў. Шукалі дакумэнты. Забралі флэшку і кнігу «Маніторынг аддзяленьняў міліцыі»)
• Уладзімер Целяпун (Мазыр, старшыня філіі «Вясны»)

Прадстаўнікі незалежнага прафсаюзу РЭП

• Ігар Комлік (Менск)
• Андрэй Комлік-Ямацін (Менск)