Аўтар помнікаў творцам, якія нарадзіліся на Ўшаччыне — вядомы беларускі скульптар Ігар Засімовіч. Арганізацыяй займаўся грамадзкі актывіст Глеб Лабадзенка. У ягоным актыве цэлы шэраг рэалізаваных праектаў дзеля ўшанавання памяці выбітных гістарычных постацяў, у тым ліку манумент Тадэвушу Касцюшку ў Мерачоўшчыне, валун на магіле Рыгора Барадуліна, іншыя помнікі і барэльефы.

Рэалізацыя праекту прымеркаваная да дня нараджэньня народнага пісьменьніка Васіля Быкава, які будзе адзначацца празь некалькі дзён, 19 чэрвеня. Летась Глеб Лабадзенка абвясьціў збор сродкаў на выраб помнікаў, іх дастаўку і мантаж. Тады ж ён атрымаў дазвол ад Вушацкага райвыканкаму паставіць бюсты ў цэнтры гораду.

Помнікі «паўсталі цалкам на народныя грошы» – сотні людзей ахвяравалі разам больш за 11 000 даляраў, напісаў Глеб Лабадзенка ў сябе ў Фэйсбуку. Каб паставіць гэтая помнікі, яму спатрэбілася два гады: «усё магло зьдзейсьніцца і раней, каб не ўсюдыісная бюракратыя».

Васіль Быкаў нарадзіўся ў вёсцы Бычкі на Вушаччыне 19 чэрвеня 1924 году. Удзельнічаў у баях на Паўднёва-Заходнім фронце. Двойчы паранены. Пасьля дэмабілізацыі ў 1947 годзе працаваў мастаком у горадзенскіх майстэрнях. Аднак у 1949-м яго зноў прызвалі ў войска, дзе ён праслужыў яшчэ 6 гадоў і толькі ў 1955-м звольніўся ў запас.

Працаваў літсупрацоўнікам газэты «Гродзенская праўда», сакратаром абласнога аддзяленьня Саюзу беларускіх пісьменьнікаў. У 1974 годзе Васіль Быкаў узнагароджаны Дзяржаўнай прэміяй СССР за аповесьці «Абэліск» і «Дажыць да сьвітаньня». У 1978 годзе пераехаў у Менск, абіраўся дэпутатам Вярхоўнага Савету, з 1989-га — народны дэпутат СССР. У 1990 годзе абраны кіраўніком Згуртаваньня беларусаў сьвету «Бацькаўшчына», адзін з заснавальнікаў Беларускага Народнага Фронту. Народны пісьменьнік БССР.

Пасьля прыходу да ўлады Лукашэнкі пачаліся нападкі на Быкава, цягам некалькіх гадоў літаратар жыў у Фінляндыі, Нямеччыне і Чэхіі. Вярнуўся на радзіму за месяц да сьмерці 22 чэрвеня 2003 году. Пахаваны на сталічных Усходніх могілках.

Рыгор Барадулін, сябра і аднадумца Васіля Быкава, нарадзіўся на хутары Верасоўка пад Вушачай 24 лютага 1935 году. Пасьля школы вучыўся на філялягічным факультэце БДУ, працаваў рэдактарам у розных газэтах і выдавецтвах. У сярэдзіне 1980-х у складзе дзяржаўнай дэлегацыі БССР браў удзел у сэсіі Генэральнай Асамблеі ААН.

Сябра Саюзу беларускіх пісьменьнікаў, адзін з стваральнікаў і кіраўнікоў Беларускага ПЭН-цэнтру, сябра Сойму БНФ, быў у кіраўніцтве Беларускага Фонду Сораса. Апошні, хто атрымаў званьне народнага паэта Беларусі.
Памёр 2 сакавіка 2014 году. Пасьля адпяваньня ў Чырвоным касьцёле ў Менску Рыгора Барадуліна пахавалі на радзіме побач з магілай маці, як таго і жадаў паэт.

Працэс усталяваньня помнікаў у фатаздымках: