Пасьля ператрусаў затрыманы сябра Сойму БНФ Павал Батуеў

У аўторак, 23 лістапада, у Салігорску затрымалі мясцовага актывіста Паўла Батуева, сябра Сойму Партыі БНФ.

Як пішуць праваабаронцы, затрымалі актывіста мінскія сілавікі, калі сп. Батуеў ішоў забіраць дачку з дзіцячага садка. Цягам мінулых гадоў у яго неаднаразова праходзілі ператрусы, а мясцовыя тэлеграм-каналы размяшчалі паклёпніцкія публікацыі на адрас актывіста і яго сям’і.

У аўторак Паўла Батуева павезлі на ператрус у хату бацькі, дзе ён жыў апошнім часам. Пасля гэтага сябру БНФ павезлі на другі ператрус — у яго асноўную кватэру. Як паведамляецца, падчас ператрусаў былі забраныя носьбіты інфармацыі, узмацняльнік вай-фаю, жончыны тэлефон, а таксама значак і нашыўка з «Пагоняй», два старыя нататнікі

У межах якой справы адбылося затрыманне, пакуль не вядома. Але крыніцы выказваюць здагадку, што справа можа быць звязаная з каментарамі ў інтэрнэце.

Пазней Павел Батуеў быў асуджаны на 15 сутак па адміністрацыйным артыкуле “за супраціў міліцыі”. Ці прад’яўлялі затрыманаму нейкія абвінавачваньні ці падозраньні ў крымінальным парадку – пакуль не паведамляецца.