Партыя БНФ » Што зрабіў для Беларусі Павал Белавус, які не выйшаў з 15 сутак арышту
Партыя БНФ - партыя абароны народных інтарэсаў


Што зрабіў для Беларусі Павал Белавус, які не выйшаў з 15 сутак арышту

Дададзена 05.12.2021 11:04:13 | 645 праглядаў

Стваральнік Symbal.by Павел Белавус не выйшаў на волю пасля 15 сутак арышту. Яго мусілі вызваліць у пятніцу ў 15:40.

Белавус15 лістапада Белавуса затрымалі выклікалі ў міліцыю і затрымалі. 17 лістапада яго судзілі за несанкцыянаваны пікет, але суд адправіў справу на дапрацоўку. Праз трое сутак пасля затрымання Белавуса не вызвалілі, а 19-га зноў судзілі і прызначылі 15 сутак арышту.

Перад тым паведамлялася, быццам прадпрымальніка затрымалі за перасылку кнігі Змітра Лукашука і Максіма Гарунова “Нацыянальная ідэя”, якую ў Беларусі прызналі экстрэмісцкай.

Абноўлена: 6 сьнежня стала вядома, што Паўла яшчэ раз судзілі па арт. 19. 1 КаАП (дробнае хуліганства). Суд Ленінскага раёна пастанавіў пакараць Паўла 13-сутачным арыштам.

Абноўлена: 16 сьнежня Павал Белавус меўся выйсьці на волю зь менскай турмы на Акрэсьціна пасьля сканчэньня другога адміністрацыйнага арышту, але яго зноў «перазатрымалі».Агулам за кратамі адзін з заснавальнікаў і першы дырэктар культурніцкай пляцоўкі «Арт Сядзіба», стваральнік крамы Symbal.by, кіраўнік кампаніі «Годна», арт-мэнэджар і журналіст Павал Белавус правёў больш за месяц, але яго засудзілі зноў.

17 сьнежня адбыўся чарговы суд над Паўлам Белавусам. Яму прысудзілі яшчэ 7 сутак паводле артыкулу 19.1 (дробнае хуліганства), паведамляе @symbalby. У няволі Павел знаходзіцца ўжо больш за месяц, яго затрымалі 15 лістапада.

Чым вядомы Павел Белавус — адзін з заснавальнікаў і першы дырэктар культурніцкай пляцоўкі «Арт Сядзіба», стваральнік крамы Symbal.by, кіраўнік кампаніі «Годна», арт-мэнэджар, журналіст, сябра БНФ “Адраджэньне”.

Скончыў геафак, але хацеў быць журналістам

Павал нарадзіўся ў Лідзе, вучыўся на геаграфічным факультэце ў Берасьцейскім дзяржаўным унівэрсытэце.

«Хоць і вучыўся на геафаку, хацеў стаць журналістам. Я паступаў туды, бо добра ведаў беларускую мову, матэматыку, і мне патрэбны быў трэці прадмет. І я такі: «О, геаграфія! Паеду паступаць на геафак». Але з другога курсу я пачаў пісаць, больш працаваў у журналісцкай сфэры. Дзякуючы геафаку, што я вучыўся ў Берасьці, я пазнаёміўся зь «Дзедзічам», які зацягнуў мяне ў актывізм», — расказваў пра сябе Павал.

 

Разам зь сябрамі заснаваў «Арт Сядзібу»

24 сьнежня 2011 году Павал Белавус разам зь сябрамі стварылі інфармацыйна-асьветніцкую арганізацыю «Арт Сядзіба». Праз канцэрты, лекцыі і забаўляльныя імпрэзы, якія рабіла «Арт Сядзіба» да беларушчыны масава далучалася моладзь па ўсёй краіне.

«Пашу я ведаю з 2009-га. Тады ён запомніўся мне сваім творчым і нестандартным падыходам. Мы разам распачыналі «Арт Сядзібу», рабілі імпрэзы, пераяжджалі з розных памяшканьняў, разам рабілі Symbal.by. Паша для мяне — гэта сапраўдны беларус, які імкнецца зрабіць усё, каб Беларусь і беларушчына былі папулярнымі і прывабнымі. І робіць усё гэта шчыра! Паша — найлепшы сябра, да якога можна зьвярнуцца па дапамогу, параду, будзь гэта вокладка, канцэпцыя новага альбому ці нейкая бізнэс-ідэя. Я заўжды ўпэўнены, што Паша не падвядзе», — кажа Зьміцер Афанасенка, лідэр гурту Amaroka.

 

Зрабіў вышыванкі ізноў моднымі, папулярызуе беларускую культуру

Пазьней Павал стварыў краму Symbal.by, якая папулярызавала рэчы і зьявы, прысьвечаныя беларускай мове, культуры і гісторыі. Вясной і летам 2020-га крама адшывала вялікія партыі ахоўных масак і перадавала іх мэдыкам па ўсёй краіне. Празь ціск уладаў на пачатку сакавіка 2021-га краму зачынілі.

У 2020 годзе Павал стварыў грамадзкую кампанію «Годна», якая прасоўвае сучасную нацыянальную ідэю Беларусі. У ёй каманды маладых людзей стваралі культурныя і гістарычныя праекты.

«Для мяне Паша — ня проста калега і сябра, ён як старэйшы брат, у якога заўсёды можна чамусьці навучыцца. Ён марыць аб тым, каб Беларусь была беларускай. Паша вельмі шмат робіць для Беларусі, для таго, каб кожны адчуў годнасьць і гонар за сваю краіну, сваю мову і культуру, ганарыўся, што ён беларус. У яго гэта атрымліваецца, бо ў яго заўсёды шмат ідэй, гараць вочы, ён натхняе тым, наколькі ён любіць сваю працу, сваю місію», — кажа мэнэджарка кампаніі «Годна», сяброўка Паўла Аліна Герашчанка.

Вось што пра Паўла і яго дзейнасьць кажа яшчэ адзін сябра і калега, актор Беларускага Свабоднага тэатру Аляксей Сапрыкін.

«Паша ў найвышэйшай ступені справядлівы чалавек. Ёсьць такі знакаміты выраз: «Ну вы ж усё самі разумееце». І вось Паша на яго заўжды адказваў: «Не, не разумею, чаму я павінен гэта разумець?». І ён шчыра хоча палепшыць нашую краіну, шмат зрабіць для беларускай мовы, культуры, традыцыяў і гісторыі. Паша вельмі палымяны чалавек, ён вельмі моцна гарыць любой справай, якую ён пачынае рабіць. Для яго праца на ніве беларушчыны стала такім пакліканьнем, стала сэнсам жыцьця, таму што ён заўсёды нешта новае прыдумляе, падхоплівае, стаіць у авангардзе розных ідэяў. Ён адзін з самых палымяных людзей, якіх я сустракаў».

У Паўла ёсьць жонка Кацярына і двое малых дзетак: Сафія і Мірон.

«Паша вельмі любіць сваю сямʼю, сваіх дзетак. У яго нават ёсьць татуіроўкі з іх імёнамі: на адной руцэ імя дачушкі, а на другой — імя сынка», — дадае сяброўка Аліна.

«Я ведаю Пашу як чалавека, які шчыра любіць Беларусь», – дадае яшчэ адзін сябра Паўла.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Студзень 2022
Пн Аў Сер Чц Пт Сб Ндз
« Сне    
 12
3456789
10111213141516
17181920212223
24252627282930
31  
Навіны Моладзі БНФ
© 2011 - 2022 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.