Салігорскі актывіст Павел Батуеў не выйшаў на волю пасля 15-суткавага арышту

Актывіст з Салігорску, сябра Сойму БНФ Павел Батуеў не выйшаў на волю пасля 15 сутак адміністрацыйнага арышту – паведамляе Беларускае Радыё Рацыя.

Паводле інфармацыі праваабарончага цэнтру “Вясна”, яго зноў прысудзілі да 15 сутак. На якой падставе – не паведамляецца.

Паўла затрымалі 23 лістапада, калі ён ішоў забіраць дачку з дзіцячага сада. Спачатку яго адвезлі ў кватэру ягонага бацькі, дзе ён часова пражывае, і правялі там ператрус. Пасля гэтага ператрус адбыўся і ў асноўнай кватэры актывіста.

7 снежня зноў адбыліся ператрусы, якія, паводле інфармацыі журналісткі Вольгі Быкоўскай, праходзілі ў межах узбуджанай крымінальнай справы. На іх Паўла прывезлі проста з ІЧУ, дзе ён адбываў пакаранне нібыта за супраціў міліцыі. Праваабаронцы пісалі, што гаворка можа ісці пра крымінальную справу па артыкуле 369 КК РБ („Знявага прадстаўніка ўлады”).