Партыя БНФ » Наша Ніва: Суд па „справе аб змове” можа пачацца ў студзені-лютым 2022 года?
Партыя БНФ - партыя абароны народных інтарэсаў


Наша Ніва: Суд па „справе аб змове” можа пачацца ў студзені-лютым 2022 года?

Дададзена 13.12.2021 12:36:25 | 625 праглядаў

Судовы працэс па „справе аб змове” можа пачацца ў студзені-лютым 2022 года. Пра гэта піша „Наша Ніва” са слоў знаёмых Юрася Зянковіча — аднаго з абвінавачаных па гэтай справе.

fiaduta_zenkovich_kastusey-l3f2nЮрыста Юрася Зянковіча, літаратуразнаўцу Аляксандра Фядуту і старшыню Партыі БНФ Рыгора Кастусёва затрымалі ўвесну 2021-га. У фільме АНТ „Забіць прэзідэнта” сцвярджалася, што яны ўступілі ў змову з мэтай гвалтоўнай змены ўлады ў Беларусі. Усе яны з’яўляюцца абвінавачанымі па крымінальным артыкуле 357 («Змова або іншыя дзеянні, здзейсненыя з мэтай захопу дзяржаўнай улады»). Палітыкам пагражае ад 8 да 12 гадоў зняволення.

Дачка Кастусёва Кацярына кажа, што хадзіла да доктара, каб даведацца вынікі біяпсіі бацькі — у яго было падазрэнне на анкалагічнае захворванне, якое пацвердзілася. Акрамя таго, палітык на нагах перанёс інфаркт. «На днях у бацькі была адвакат. І што мяне радуе, дык гэта тое, што настрой у яго бадзёры, ён больш аптымістычна настроены, а гэта ўжо нямала», — дадае Кацярына.

Кастусёва і Фядуту перавялі з турмы КДБ („Амерыканкі”) ў СІЗА №1 на вуліцы Валадарскага. Жонка Фядуты Марына Шыбко кажа, што аніводнага ліста ад мужа з „Валадаркі” яшчэ не атрымала. Следчыя дзеянні з Фядутам не вяліся з лістапада.

«У апошнім лісце муж пісаў пра літаратуразнаўцу Марыэту Чудакову. Яна нядаўна памерла, а АІФ (Аляксандр Іосіфавіч Фядута — Заўв. Нашай Нівы) быў знаёмы з ёй: яны разам былі на канферэнцыі па Булгакаву ў Кіеве: «Гэта была дзіўная кабета, поўная энергіі стварэння.» Пісаў таксама, што гуляюць з сукамернікамі ў нарды. Згадваў Пятра Марцава і ўсю рэдакцыю тагачаснай «БДГ»».

Жонка Юрася Зянковіча ад каментароў адмовілася. Але яго знаёмыя і паплечнікі па партыі кажуць, што сітуацыя ў яго такая ж, як і ў затрыманых з ім па адной справе Фядуты і Кастусёва. Ëн проста існуе ў чаканні суда. «З лістамі справа зусім дрэнная. З тых, каго я ведаю, ніхто ад яго нічога не атрымліваў», — пракаментаваў адзін з членаў Партыі БНФ становішча з перапіскай з Юрасём Зянковічам. Праблемы з ліставаннем адзначаюць і іншыя сваякі:

«Юрась сам лістоў практычна не атрымлівае. Ад яго да бацькоў таксама іх мала. Але пачуваецца ён больш-менш. Тое пацвярджае і адвакат (калі казаць пра фізічны стан). Следства ідзе, і на сёння кажуць пра магчымы суд у студзені-лютым».

З навінаў, якія дачка старшыні Партыі БНФ яшчэ ведае пра бацьку — тое, што Рыгору Кастусёву забаранілі ўзяць з сабой плед і тэлевізар.

«Мы яшчэ жартавалі: а як без тэлевізара палітінфармацыю да затрыманых даносіць? А яшчэ ведаю, калі іх нядаўна хацелі вывесці на шпацыр, то вызваліся толькі два чалавекі, таму што выхад затапіла вадой няслаба, і трэба было ісці праз яе. Сказалі, што іншай дарогай нельга ісці. Абсурдная рэч, канечне. Здавалася б, такога ў ХХI стагоддзі быць не павінна» – кажа Кацярына Кастусёва.

Тэрмін утрымання Рыгору Кастусёву працягнулі на чарговыя два месяцы — да лютага 2022 года. Хадайніцтвы аб змене меры ўтрымання на хатні арышт праз стан здароўя да гэтага ўвесь час заставаліся без задавальнення.

 

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Студзень 2022
Пн Аў Сер Чц Пт Сб Ндз
« Сне    
 12
3456789
10111213141516
17181920212223
24252627282930
31  
Навіны Моладзі БНФ
© 2011 - 2022 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.