У Слоніме ГУБАЗіК затрымаў актывіста БНФ Віктара Марчыка

Актывісту Партыі БНФ са Слоніма Віктару Марчыку суд прызначыў 7 дзён адміністрацыйнага арышту, паведамляюць праваабаронцы.

18 лістапада ў выязным судзе ў РАУС Слонімскага раёна прайшоў суд над Віктарам Марчыкам, якога абвінавацілі на падставе ч.2 арт.19.11 КоАП РБ (Распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць).

Спадара Марчыка затрымалі напярэдадні сіламі ГУБАЗіКа.

Суддзя прызнаў Віктара вінаватым і пастанавіў сем дзён адміністрацыйнага арышту з канфіскацыяй мабільнага тэлефона. Падставай для затрымання паслужылі рэпосты, зробленыя яшчэ ў 20-21-х гадах у адным з тэлеграм-чатаў.

Віктар Марчык быў кандыдатам у дэпутаты парламенту ад Партыі БНФ.