Партыя БНФ » Рыгор Кастусёў: у трэці раз – дзень народзінаў за кратамі
Партыя БНФ - партыя абароны народных інтарэсаў


Рыгор Кастусёў: у трэці раз – дзень народзінаў за кратамі

Дададзена 17.04.2023 11:48:22 | 172 праглядаў

Адзін з найбольш дасведчаных дэмакратычных палітыкаў, грамадскі актывіст і публіцыст Рыгор Кастусёў 17 красавіка адзначае 66-гадовы дзень нараджэння — ужо другі запар за кратамі. Сябры расказалі пра фізічны і маральны стан палітвязня, асуджанага на 10 гадоў нібыта за «змову з мэтай захопу ўлады неканстытуцыйным шляхам».

Летась у снежні Рыгора Кастусёва этапавалі ў папраўчую калонію № 22 Івацэвічаў, хоць сам ён хадайнічаў перад Дэпартаментам выканання пакаранняў МУС, каб адбываць прысуджаны тэрмін на малой радзіме – у Шклове ці Магілёве. Гуманізму ў ведамстве чакана не праявілі.  

Нагадаем, Рыгора Кастусёва затрымалі 12 красавіка 2021 года ў Шклове ў  межах крымінальнай справы паводле арт. 357 – «змова ці іншыя дзеянні, здзейсненыя з мэтай захопу дзяржаўнай улады». Паралельна ў Маскве ды іншых месцах арыштавалі астатніх «змоўшчыкаў» – Аляксандра Фядуту, Юрыя Зянковіча, Дзяніса Краўчука, Вольгу Галубовіч. Праваабаронцы прызналі ўсіх палітычнымі вязнямі.  

Больш за год абвінавачаных трымалі ў следчых ізалятарах ГУУС Мінгарвыканкама і Камітэта дзяржбяспекі, а летась у чэрвені Генпракуратура паведаміла, што рэзанансную справу накіравалі ў суд. 

Разгляд пачаўся 29 ліпеня ў Мінскім раённым судзе, яшчэ праз месяц дзяржаўны абвінаваўца Міхаіл Кавалёў запатрабаваў для Рыгора Кастусёва 12 гадоў зняволення. У выніку суддзя Уладзімір Арэшка прызнаў палітыка вінаватым і прысудзіў яму 10 гадоў калоніі ва ўмовах узмоцненага рэжыму.

Вярхоўны суд пакінуў прысуд Рыгору Кастусёву ды іншым фігурантам у сіле. Сам палітык сваёй віны ў інкрымінаваных «злачынствах» не прызнаў.

У канцы мінулага года Міністэрства ўнутраных спраў дадало ягонае прозвішча ў так званы пералік грамадзян Беларусі, замежных грамадзян і  асоб без грамадзянства, датычных да «экстрэмісцкай дзейнасці».

Яшчэ ў СІЗА ў Рыгора Кастусёва абвастрыліся праблемы са здароўем — у прыватнасці, выявілася анкалагічнае захворванне. Настойлівыя звароты  адвакатаў з просьбай забяспечыць належнае медыцынскае абследаванне зняволенага плёну не маюць дагэтуль. 

Як стала вядома ад сяброў Рыгора Кастусёва, з улікам «цяжкасці крымінальнага артыкула» падрабязнасці існавання за калючым дротам калоніі ў Івацэвічах пакрытыя таямніцай. 

З незразумелых прычын палітвязня пазбавілі спатканняў са сваякамі — апошняе здарылася ў СІЗА КДБ адразу пасля суда. Акрамя таго, яму істотна зменшылі суму атаваркі ў мясцовай краме — зрэшты, гэта ўжо збольшага тэндэнцыя, бо пра тое ж наракаюць і іншыя «палітычныя».

Калі з ізалятараў лісты да жонкі даходзілі без моцных затрымак, то цяпер з гэтым вялікія праблемы. Няма дакладных звестак адносна таго, ці не намагаюцца яго прыцягваць да лагерных работ — асабліва з улікам пенсійнага ўзросту і медыцынскіх абмежаванняў.  

Гэтак жа няма пэўнасці адносна актуальнага фізічнага стану вязня. Нібыта ўжо з калоніі павінны былі адправіць на абследаванне ў лякарню, аднак, як вынікае з папярэдніх спробаў, вынікі агляду адміністрацыя папраўчай установы нікому не паведамляе, а рэкамендацыі цывільных лекараў збольшага ігнаруюцца.

Рыгор Кастусёў — зямляк Аляксандра Лукашэнкі, абодва выпускнікі  Беларускай дзяржаўнай сельскагаспадарчай акадэміі. У свой час іх шляхі перакрыжоўваліся спачатку на пасадах кіраўнікоў саўгасаў, а пасля і ў бытнасць Рыгора Кастусёва дырэктарам Шклоўскага раённага аб’яднання жыллёва-камунальнай гаспадаркі.

Аднак ідэйна яны заўсёды былі прынцыпова на розных ідэалагічных платформах. У 1989 годзе Рыгор Кастусёў далучыўся да Беларускага народнага фронта.

На прэзідэнцкіх выбарах-2010 Рыгор Кастусёў быў кандыдатам на найвышэйшую дзяржаўную пасаду ад Партыі БНФ. Тады разам з іншымі прэтэндэнтамі яго затрымалі, але крымінальнага пераследу пазбег.   

Пазней быў абраны кіраўніком партыйнай арганізацыі, якая на хвалі татальнай зачысткі грамадзянскай супольнасці пасля драматычных падзей 2020 года ўлады ліквідавалі.

Цяперашні 10-гадовы тэрмін зняволення Рыгора Кастусёва аднапартыйцы параўноўваюць з «пажыццём прысудам», маючы на ўвазе перадусім наяўныя праблемы са здароўем і паважаны ўзрост.

Рыгор Кастусёў друкаваўся з палітычнай аналітыкай у незалежнай прэсе, быў сябрам БАЖ.  

Павіншуйце палітвязня лістамі і тэлеграмамі:

ПК № 22, 225295, Брэсцкая вобласць, Івацэвічы, ст. Даманава, а/с 20, Рыгор Андрэевіч Кастусёў

Leave a Reply

Your email address will not be published. Required fields are marked *

Чэрвень 2023
M T W T F S S
« May    
 1234
567891011
12131415161718
19202122232425
2627282930  
Навіны Моладзі БНФ
© 2011 - 2023 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.