Партыя БНФ » Травеньскі Сойм БНФ прайшоў у анлайн-фармаце
Партыя БНФ - партыя абароны народных інтарэсаў


Травеньскі Сойм БНФ прайшоў у анлайн-фармаце

Пасяджэньне Сойму Партыі БНФ адбылося 10 траўня

10 траўня з ініцыятывы старшыні Партыі БНФ Рыгора Кастусёва было скліканае тэрміновае пасяджэньне Сойму Партыі БНФ і Сойму Грамадзкага аб’яднаньня БНФ “Адраджэньне”.

У сувязі са складанай эпідэмічнай сітуацыяй праз пандэмію каронавіруса, травеньскае пасяджэньне Сойму адбылося ў анлайн-фармаце шляхам відэаканфэрэнцыі, як і мінулае скліканьне кіруючага органа партыі і руху 29 сакавіка. Магчымасьць правядзеньня ан-лайн паседжаньняў кіруючага органа партыі прадугледжаная зменамі, якія былі ўнесеныя ў статут у 2019 годзе.

Паседжаньне Сойму прайшло 10 траўня і было ў першую чаргу было прысьвечанае пытаньню абвяшчэньня чарговых выбараў прэзыдэнта краіны.

Парадак дня Сойму:

1. Аб пазыцыі партыі БНФ адносна правядзеньня выбарчай кампаніі ва ўмовах пандэміі каронавіруснай інфекцыі

2. Аб удзеле Партыі БНФ у кампаніі “Права выбару 2020″

3. Аб  вылучэньні прадстаўнікоў партыі ў выбарчыя камісіі

4. Рознае

31Сойм заслухаў даклад старшныі Партыі БНФ з ацэнкай бяздзеяньня ўладаў у справе супрацьдзеяньня пандэміі COVID19. Рыгор Кастусёў ацаніў дзеяньні ўладаў па абвяшчэньні выбараў у часе пандэміі як злачынныя і небясьпечныя для зароўя насельніцтва: “Улады не толькі не выканалі рэкамендацыяў АБСЭ датычна зьмяненьня выбарчага заканадаўства, але таксама ігнаруюць і рэкамендацыі Сусьветнай арганізацыі сховы здароўя датычна захадаў сацыяльнага дыстанцыяваньня і мінімізацыі масавых мерапрыемстваў. Тыя прапановы, што мы адрасавалі ўладам ў сакавіку дзеля прадухіленьня пашырэньня каранавірусу ў Беларусі ды належнага інфармаваньня грамадзянаў пра сапраўдны стан рэчаў, а таксама дзеля падтрымкі беларускага бізнэсу ды хатніх гаспадарак беларусаў, засталіся праігараваныя адміністрацыяй. Відавочна, што яны думаюць не пра бясьпеку для беларускага народа, а пра сваю карысьць” – сказаў старшыня Партыі БНФ Рыгор Кастусёў.

Ва ўмовах пандэміі і пры такіх дзеяньнях рэжыму ўяўляецца немагчымым выкананьне таго рашэньне пра вылучэньне кандыдата ад Партыі БНФ на прэзыдэнцкія выбары, якое было прынятае ў 2017 годзе XVIII Зьездам Партыі БНФ.

Лідэр БНФ падзякаваў тым сябрам Сойму і шараговым фронтаўцам з рэгіянальных структураў, якія ўключыліся ў самаахвярную барацьбу з каранавіруснай інфэкцыяй праз збор сродкаў і ўдзел у валянтэрскіх ініцыятывах. Пры гэтым падчас пасяджэньня Сойму некаторыя з сябраў кіруючага органа БНФ выходзілі на сувязь наўпрост са шпіталёў, знаходзячыся на пярэднім краі барацьбы з інфэкцыяй.

У абмеркаваньні грамадзка-палітычнай і эпідэміялягічнай сытуацыі ўзялі ўдзел намесьнікі старшыні БНФ Зьміцер Салошкін, Аляксей Янукевіч, Вадзім Саранчукоў, сябры Сойму БНФ Юрась Меляшкевіч, Кацярына Шуст, Леанарда Мухіна, Зьміцер Салаўёў, Юры Чавусаў.

Па выніках абмеркаваньня Сойм БНФ прыняў палітычную заяву “Уцягваць людзей ў выбарчае махлярства падчас пандэміі – падвойнае злачынства“.

У заяве даецца крытычная ацэнка паводзінам уладаў, якія пайшлі на злачынны крок, прызначыўшы выбары без ажыцьцяўленьня захадаў па барацьбе з эпідэміяй каранавіруснай хваробы: “Дзеяньні уладаў падчас пандэміі, асабліва пасьля таго, як каранавірус зьявіўся ў Беларусі, абвастрылі і выразна прадэманстравалі ўсе найгоршыя заганы цяперашняга аўтарытарнага рэжыму: адарванасьць улады ад народу, грэбаваньне ўлады надзённымі клопатамі беларусаў, стаўленьне чыноўнікаў да грамадзянаў як да біямасы, чыя адзіная каштоўнасьць і прызначэньне – абслугоўваць патрэбы вузкай касты людзей наверсе ўладнай піраміды, хлусьня беларускаму народу, хамскае стаўленьне да людзей, безадказнасьць, карупцыя ды кругавая парука. Найяскравейшым прыкладам усіх названых заганаў улады зьявілася правядзеньне масавых мерапрыемстваў 9 траўня, у тым ліку вайсковага параду і канцэрту. Дзеля задавальненьня ўласных амбіцыяў Аляксандр Лукашэнка сваім валюнтарыскім  рашэньнем паставіў пад сур’ёзную пагрозу здароўе і жыцьці тысячаў людзей, сярод іх – вэтэранаў ІІ сусветнай вайны ды пэнсыянэраў, якія належаць да асаблівай групы рызыкі.” – гаворыцца ў заяве Сойму.

Правядзеньне выбарчай кампаніі ва ўмовах пандэміі зьяўляецца гранічна безадказным і небясьпечным – сцвярджае Сойм БНФ. Кіруючы орган партыі заяўляе, што ва ўмовах пашырэннья каранавірусу ў Беларусі правядзеньне выбарчай кампаніі немагчымае: “Ва ўмовах пандэміі падчас выбарчай кампаніі немагчыма таксама дасягнуць тых тактычных і стратэгічных мэтаў на будучыню, якія могуць апраўдваць удзел дэмакратычных кандыдатаў у недэмакратычных, несвабодных і несумленных выбарах, якімі яны зьяўляюцца ў Беларусі з 1995 году”.  Грунтуючыся на пералічаных вышэй прычынах, Сойм Партыі БНФ прыняў рашэньне аб няўдзеле Партыі ў прэзыдэнцкіх выбарах 2020 году. Партыя ня будзе вылучаць свайго кандыдата, а таксама ня будзе падтрымліваць ніякага іншага кандыдата. 

Партыя БНФ заклікае ўсе дэмакратычныя палітычныя сілы і ўсіх патэнцыйных кандыдатаў, якія лічаць сабе беларускімі патрыётамі, адмовіцца ад вылучэньня сваёй кандыдатуры на гэтыя выбары. Партыя БНФ заяўляе, што Аляксандр Лукашэнка цягам некалькіх кадэнцыяў з’яўляецца нелегітымным кіраўніком краіны і не мае права балятавацца на пасаду прэзыдэнта, ня толькі юрыдычна, але перадусім таму, што ягоны чарговы тэрмін будзе мець катастрафічныя наступствы для беларускай дзяржаўнасьці, эканомікі і грамадзтва, для здароў’я насельніцтва.

Калі беларускія палітыкі супольна праявяць палітычную сьпеласьць і адмовяцца ад удзелу ў небясьпечнай выбарчай кампаніі падчас пандэміі, выбарчая кампанія павінная быць спыненая і прызначаныя паўторныя выбары. Да правядзеньня паўторных выбараў Партыя БНФ прапануе правесьці Круглы стол нацыянальнай згоды дзеля абмеркаваньня шляхоў супрацьстаяньня каранавіруснай пандэміі і палітычных рэформаў у Беларусі.

Партыя БНФ таксама заклікала палітычныя партыі, якія ўдзельнічаюць у кампаніі назіраньня “Права выбару”, й перафарматаваць яе ва ўмовах пандэміі з кампаніі назіраньня за выбарамі ў кампанію выяўленьня ды фіксаваньня злачынных дзеяньняў цяперашняй улады, якая будзе ў цені каранавіруса праводзіць маніпуляцыі, фальсіфікацыі і рэпрэсіі яшчэ больш нахабна, безсаромна, а цяпер і са сьмяротнай небяспекай для беларусаў.

Дадаткова намесьнік старшыні Партыі БНФ Зьміцер Салошкін праінфармаваў сябраў Сойму датычна бягучых справаў падрыхтоўкі кампаніі назіраньня “Права выбару”, уключна з тэхнічнымі задачамі ўдзелу ў кампаніі на ўзроўні рэгіянальных структураў, навучаньня, працы на ўчастках.

Сойм прыняў рашэньне рэкамендаваць арганізацыйным структурам Партыі БНФ і Грамадзкага аб’яднаньня БНФ “Адраджэньне” вылучаць прадстаўнікоў у склад тэрытарыяльных камсій (дакументы павінныя быць пададзеныя ў выканкамы да 17 траўня) і ўчастковых камсій (вылучэньне ажыцьцяўляецца ў чэрвені).

Рашэньнем Сойму вылучаныя назіральнікі ў цэнтральную камісію па выбарах, у тэрытарыяльныя выбарчыя камісіі (абласныя, гарадзкія, раённыя), а таксама назіральнікі на ўчасткі для галасаваньня (ў далейшым падчас кампаніі  назіральнікі будуць вылучацца дадаткова рэшэньнямі тэрытарыяльных арганізацый Партыі БНФ і Грамадзкага аб’яднаньня БНФ “Адраджэньне”).

ecr partyНамесьнік старшыні БНФ Аляксей Янукевіч распавёў Сойму пра стан міжнародных стасункаў Партыі БНФ, якія цяпер ускладняюцца праз зачыненыя з-за каранавіруса межы. У прыватнасьці, сп. Янукевіч распавёў пра камунікацыю з партнэрскімі партыямі Чэхіі, Вялікай Брытаніі, Польшчы, Швэцыі, Арменіі, Латвіі, Харватыі і Нямеччыны. Палітык таксама станоўча ацаніў дынаміку развіцьця стасункаў на ўзроўні Партыі Эўрапэйскіх Кансэрватараў і Рэфармістаў. Аляксей Янукевіч заклікаў далучацца да дэбатаў пра будучыню NATO, што 14 траўня ладзіць агульнаэўрапэйская партыя, чальцом якой ёсьць БНФ:

У “Розным” сябры Сойму і намесьнік старшыні Партыі БНФ Вадзім Саранчукоў  абмеркавалі тэхнічныя пытаньні дастаўкі сродкаў індывідуальнай абароны для медыкаў у шпіталі розных рэгіёнаў краіны.

Сябра Сойму Юрый Чавусаў заклікаў прадстаўнікоў рэгіянальных структураў аператыўна паведамляць пра ўсе выпадкі ціску на партыных актывістаў па месцы працы ці вучобы, каб гэтая інфармацыя атрымлівала максымальны розшалас, што мэтазгодна для абароны сябраў партыі ад падобнай дыскрымінацыі і рэпрэсіяў.

Сябры Сойму Вітольд Ашурак і Сяргей Пантус распавялі пра перасьлед удзельнікаў пікету, што адбыўся на Лідчыне з нагоды чарговай гадавіны аварыі на Чарнобыльскай АЭС. Сябры сойму таксама распавялі пра затрыманьні ўдзельнікаў акцыяў пратэсту, што адбыліся ў першыя дні пасьля абвяшчэньн прэзыдэнцкіх выбараў у розных гарадах (сярод затрыманых ёсьць і актывісты Партыі БНФ з Віцебску, Магілёва, Вілейкі ды іншых мясьцінаў).

 

 

 

Чэрвень 2020
Пн Аў Сер Чц Пт Сб Ндз
« Тра    
1234567
891011121314
15161718192021
22232425262728
2930  
© 2011 - 2020 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.