Партыя БНФ » Лютаўскі Сойм БНФ: вынікі
Партыя БНФ - партыя абароны народных інтарэсаў


Лютаўскі Сойм БНФ: вынікі

20 лютага ў Менску адбыўся Сойм Партыі БНФ і Сойм Грамадскага аб’яднання БНФ “Адраджэньне”

Парадак дня Сойму Партыі БНФ:

1. Аб палітычнай сітуацыі
2. Аб праверках міністэрства юстыцыі і справаздачнасьці
3. Аб планаваньні дзейнасьці партыі і партыйных камісіяў на 2021-23гг.
4. Аб рэпрэсіях рэжыма супраць сябраў Партыі БНФ
5. Аб юрыдычных адрасах партыйных структураў
6. Рознае

Парадак дня Сойму Грамадзкага аб’яднаньня БНФ “Адраджэньне”

1. Аб вылучэнні прадстаўніка ГА БНФ “Адраджэньне” ў грамадскую
назіральную камісію пры Міністэрстве культуры па ахове гісторыка-
культурнай спадчыны.
2. Аб змене юрыдычнага адраса ГА БНФ “Адраджэньне”.
3. Рознае.

На лютаўскім Сойме БНФЗ дакладам аб палітычнай сытуацыі выступіў старшыня Партыі БНФ Рыгор Кастусёў. Ён адзначыў, што з часоў правядзеньня мінулага, сьнежаньскага, Сойму БНФ павялічыўся наступ ўладаў і дзяржаўных прапагандыстаў на нацыянальную сымболіку, якой пагражае забарона. Такім чынам, пацьвердзілася актуальнасьць заявы ў абарону бел-чырвона-белага сьцягу і гербу Пагоня, якая была прыянтая Соймам. “Пагроза рэпрэсіяў супраць забароны нацыянальнай сымболікі і рэпрэсіі супраць грамадзян – гэта частка адной хвалі ўцсіку, якім рэжым хоча задушыць справядлівае абурэньне людзей, задушыць грамадзкі пратэст супраця цяперашняга рэпрэсіўнага курсу, задушыць і зьнішчыць чалавечую годнасьць і грамадзкую самасьвядомасьць, якая павысілася ў апошнія месяцы. Але сімвалы, пад якімі беларусы змагаліся за свабоду і незалежнасьць, за якія людзі пралівалі кроў і за якія ахвяруюць цяпер сваіім жыцьцём – перамагчы не атрымаецца. Іх нельга забараніць – як нельга забараніць самое жыцьцё” – сказаў Рыгор Кастусёў.

Старшыня БНФ таксама выказаў трывогу, што разам са спробамі небясьпечных ініцыятываў забароны нацыянальнай сымболікі заўважныя асобныя небясьпечныя крокі і на адрас беларускай мовы. У прыватнасьці, у Менску адміністрацыі некаторых школаў праводзяць незразумелае анкетаваньне на тэму ці жадаюць бацькі каб іх дзеці вывучалі беларускую мову. Як выглядае, рэжым пармацвае перспектывы запаліць новую антыбеларускую кампанію – гэтым разам распальваючы варажнечу па моўнай прыкмеце. Старшыня БНФ выказаў заклік быць пільнымі да гэтых спробаў і адзначыў перасьцярогу, што архітэктарамі падобных крокаў могуць быць засланыя з Масквы на дапамогу цяперашняму рэжыму расейскія “паліттэхнолягі”, што спецыялізуюцца на распальваньні грамадзкіх канфліктаў.

На прапанову старшыні Партыі БНФ Соймам была пранятая рэзалюцыя пра пазыцыю Партыі БНФ аб неабходнасьці вяртаньня сытуацыі ў Беларусі ў прававое поле. “Першыя справы па абвінавачаньнях у тэрарызме, выпадкі блякаваньня чыгуначных шляхоў, каля трох соцень палітычных зьняволеных (і тысячы падазраваных і абвінавачаных у межах двух тысяч крымінальных справаў), масавыя ператрусы ў арганізацыях грамадзянскай супольнасьці, абсурдныя прапановы заканадаўчых зьменаў у закон аб барацьбе з экстрэмізмам, ганебная падтрымка ініцыятываў аб забароне беларускай нацыянальнай сымболікі, заклікі да насільля супраць апазыцыі ў дзяржаўных СМІ, публічныя дамоўленасьці аб супрацы з расейскай нацыянальнай гвардыяй – усё гэта сьведчыць пра радыкалізацыю супрацьстаяньня і сасьпяваньне канфлікту да ўзроўню грамадзянскай вайны, з вялікай рызыкай замежнай інтэрвэнцыі” – гаворыцца ў дакумэнце. “Змагаючыся са справядлівым абурэньнем людзей шляхам неправавога ўдушэньня грамадзянскіх свабодаў улады гуляюцца з агнём і могуць справакаваць сацыяльны выбух у новых, больш небясьпечных формах. Рэжым імкнецца ўцягнуць у неправавую дзейнасьць, і такім чынам запэцкаць, максымальную колькасьць супрацоўнікаў праваахоўных органаў і дзяржслужбоўцаў” – падкрэслівае Партыя БНФ.

Не здымаючы ўласных праграмных мэтаў і захоўваючы безумоўныя патрабваньні спыненьня палітычных рэпрэсіяў, БНФ лічыць, што любое вырашэньне сытуацыі ў краіне на карысьць беларускай дзяржавы і грамадзтва магчымае толькі пры адной рамкавай умове: вяртаньне сытуацыі ў прававое поле. Дзеля гэтага неабходныя наступныя крокі:

  • - Спыненьне рэйдаў МУС, ДФР ды іншых сілавых структураў супраць СМІ, арганізацыяў грамадзянскай супольнасьці і ўдзельнікаў мірных пратэстаў (уключна з недапушчэньнем арышту грамадзянаў на падставе ўдзелу ў масавых мерапрыемствах, якія не суправаджаюцца гвалтам), у тым ліку спыненьне аблаваў на дваравых акцыях і нападаў на дамы і кватэры грамадзян.
  • - Выкараненьне практыкі катаваньняў у дачыненьні да арыштаваных і зьняволеных, расьледваньне выпадкаў катаваньняў і сьмерцьцяў пратэстоўцаў.
  • - Запрашэньне міжнародных экспэртаў ААН і АБСЭ дзеля назіраньня за сьледствам і судовымі працэсамі па справах, якія зьвязаныя з абвінавачваньнем у тэрарызме, у тым ліку запрашэньне спецыяльнага дакладчыка ААН па пытанні аб заахвочваньні і абароне правоў чалавека і асноўных свабодаў ва ўмовах барацьбы з тэрарызмам.
  • - Адмова ад плянаў рэпрэсіўных паправак у законы і практыку, у тым ліку ад абвяшчэньня перараэгістрацыі палітычных партыяў, ад анансаванай дыскрымінацыі апанентаў дзеючай улады праз закон аб экстрэмізме ды ад забароны нацыянальнага бел-чырвона-белага сьцягу, а таксама мараторый на ўвядзенне новых падаткаў ды бюракратычных абмежаванняў для бізнэсу, уключна з індывідуальнымі прадпрымальнікамі.
  • - Адмова ад канстытуцыйнай рэформы (у тым ліку ад якога-кольвек рэферэндума) як немагчымай у цяперашняй сытуацыі паўсюдных рэпрэсіяў і ігнараваньня прававых нормаў.
  • - Прызначыць правядзеньне мясцовых выбараў на тэрмін не пазьней за лета 2021 года і правесьці іх ва ўмовах поўнай празрыстасьці і ў адпаведнасьці з міжнароднымі стандартамі

Старшыня Партыі БНФ распавёў пра інфармацыйны націск на партыю з розных сродкаў прапаганды датычна гэтак званага “усебеларускага народнага сходу”. Рыгор Кастусёў яшчэ раз падкрэсліў партыйную пазыцыю непрызнаньня гэтага органа легітымным прадстаўніцтвам беларускага народу і выказаў задавальненьне тым, што цяпер гэтую ацэнку падзяляе большасьць насельніцтва Беларусі. “Гэты сход быў сходам нешматлікіх прыхільнікаў Лукашэнкі і ягонай няўдалай спробай самалегітымізацыі яго самога ў якасьці кіраўніка краіны, які карыстаецца хоць нейкай падтрымкай хаця б чыноўнікаў” – сказаў Рыгор Кастусёў.

Запрашэньне апазыцыйных партыяў на “усебеларускі народны сход” старшыня БНФ расцаніў як спробу ўладаў унесьці раскол у шэрагі дэмакратычных сілаў. У якасьці адваротнага прыкладу яднаньня ўсіх здаровых сілаў на глебе непрызнаньня дзяржаўнага тэрору і пад лёзынгамі дэмакратыі і сацыяльнай справядлівасьці старшыня БНФ прывёў свой ўдзел у другім форуме дэмакратычных левых сілаў “За роўнасьць і сацыяльную справядлівасьць”.

Разам з тым Рыгор Кастусёў выказаў занепакоенасьць тым курсам на працяг татальных рэпрэсіяў і ўдушэньня беларускага бізнэсу, які быў абвешчаны падчас сустрэчы Лукашэнгкі са сваімі памагатымі пад шыльдай “усебеларускага народнага сходу”. Сярод словаў, якія прагучалі ад Лукашэнкі падчас сходу, Рыгор Кастусёў асобна адзначыў крытыку на адарс праграмы БНФ, якую той спрабуе прадставіць у якасьці праграмы ўсёй апазыцыі: “Тое, што лукашэнка спрачаецца з праграмай БНФ, а выстаўляе яе ў якасьці праграмы апазыцыі – сьведчаньне таго, што ніякай іншай праграмнай альтэрнатывы цяперашняй тыраніі, апроч як нацыянальна-дэмакратычная праграма развіцьця – няма! Лукашэнка такім чынам вымушана прызнае сілу нашых праграмных палажэнняў. Ён і ягоныя спічрайтэры ўсведамляюць, што праграма нацыянальна-дэмакратычных сілаў – галоўная каштоўнасная альтэрнатыва лукашызму” – падкрэсліў Рыгор Кастусёў і заклікаў прадстаўнікоў “новай апазыцыі” не сароміцца нацыянальных каштоўнасьцяў, мовы і эўрапэйскай арыентацыі.

Асаблівую небясьпеку, паводле Рыгора Кастусёва, нясе агучаная падчасм нарады Лукашэнкі з ягонымі памагатымі ініцыятыва аб адмове ад замацаванага ў Канстытуцыі нейтральнага статусу Беларусі на карысьць адкрытага падпарадкаваньня Расеі. На думку палітыка, такім чынам Лукашэнка жадае падкупіць Расею і заручыцца новым траншам крамлёўскай падтрымкі для забесьпячэньня сваёй аўтарытарнай улады над беларускім народам.

Кіраўніцтва Беларусі ўсяляк імкнецца здабыць у Расіі матэрыяльную падтрымку дзеля ўтрымання цяперашняга рэжыму, які не мае даверу народа і трымаецца толькі на сіле прымусу і расійскіх датацыях. Аднак ў абмен на падтрымку Крэмль патрабуе ад Мінску незваротных крокаў у падпарадкаванні Беларусі знешняму кантролю: “Лукашэнку патрэбныя крэдыты, паколькі старая расійская падтрымка ўжо праедзеная. Становішча ў эканоміцы надзвычай дрэннае, таму тэрмінова патрэбныя грошы. Эўрапейскія крэдытныя лініі зачыненыя з-за ўнутранай палітыкі рэпрэсіяў. Выкалачваць грошы з мясцовага бізнэсу і насельніцтва да бясконцасці немагчыма. А з Пуціным можна дамовіцца на новую падтрымку, як, прынамсі, і на растэрміноўку ранейшых крэдытаў. Узнікае пытанне — які будзе кошт такой дамовы для беларускага народа і беларускай дзяржавы?” – задае рытарычнае пытаньне Рыгор Кастусёў.

Паводле кіраўніка БНФ, адрозненне цяперашняй сітуацыі ў тым, што Расіі ўжо мала лукашэнкавых завярэнняў ў братэрстве і саюзніцкіх стасунках. Крамлю патрэбныя рэальныя саступкі, у тым ліку рэальныя кавалкі беларускага сувэрэнітэту. Іх мэта — кантраляваць не толькі цяперашнюю Беларусь (што ажыццяўляецца надзейна, менавіта праз прарасійскую палітыку Лукашэнкі), але і важней — кантраляваць будучыню нашай краіны.

“Расія пасля Крыму адчувае патрэбу ў новых тэрытарыяльных захопах. І Беларусь, відавочна, адзін з патэнцыйных напрамкаў захопніцкай экспансіі. Але, разам з гэтым, у Крамлі разумеюць, што любыя подпісы Лукашэнкі пад дакументамі і ягоныя абяцанні нічога не вартыя. Яны не легітымныя ў вачах беларускага народу. І здача суверэнітэту Лукашэнкам ніколі не будзе прызнаная законным крокам. Таму крамлёўскае кіраўніцтва імкнецца да таго, каб Лукашэнка не проста здаваў кавалкі беларускай незалежнасці, а рабіў гэта такім чынам, каб была забяспечана бачнасць “дэмакратычнасці” і “законнасці” гэтых ягоных крокаў, што б дазволіла забяспечыць кантроль над краінай і пасля сыходу Лукашэнкі. Як адзін з варыянтаў здзяйснення такіх планаў Крамля — змены ў Канстытуцыі Рэспублікі Беларусь праз рэфэрэндум. У вачах Лукашэнкі Канстытуцыя, таксама як і любы закон — гэта нікчэмная паперка. Ён яе неаднаразова нахабна парушаў, перапісваў пад сябе, нават тую рэдакцыю, якую ў 1996 годзе напісалі для яго. Ёсць небяспека, што ён бяздумна пагодзіцца на інсцэніроўку канстытуцыйнай рэформы і замацаванне ў Канстытуцыі падпарадкаванага статусу Беларусі як расійскай калоніі, пагадзіўшыся на гэта ў абмен на падтрымку цяперашняга рэжыму ў гэты складаны для яго момант” – сказаў Рыгор Кастусёў у сваім дакладзе на Сойме Партыі БНФ.

Старшыня БНФ таксама паведаміў, што ўжо падрыхтаваныя дакументы на працяг размяшчэння ў Беларусі расійскіх вайсковых аб’ектаў (станцыі сувязі і радыёлакацыйнай станцыі). “Усё ідзе да таго, што ў бліжэйшы час зноў актывізуецца пытанне пра прыняццё адзінай валюты — расійскай — на тэрыторыі Беларусі, адмову ад эканамічнага сувэрэнітэту. Ёсьць меркаванне, што разглядаюцца пытаньні па размяшчэнні дзвюх паўнавартасных вайсковых базаў Расійскай Фэдэрацыі на тэрыторыі Беларусі, датычных як авіацыі з ядзернай зброяй на борце, так і сухапутных, танкавых войскаў. Сітуацыя надзвычай сур’ёзная, і пагроза для незалежнасьці Беларусі цяпер як ніколі вялікая” – сказаў лідэр БНФ.

У другім пытаньні парадеку дня датычна праверак і справаздачаў партыі перад рэгіструючымі органамі Рыгор Кастусёў паведаміў Сойму, што згодна з рашэньнем кіруючага органа партыі была выказаная нязгода з пісьмовым папярэджаньнем, якое партыя атрымала за адмову прадставіць персанальныя спісы сябраў партыі. Вярхоўны суд разгледзіў скаргу, і падчас разгляду была выяўленая поўная законнасьць і абгрунтаванасьць партыйнай пазыцыі. Тым ня меньш, з палітычных прычынаў судом скарга была адкінутая і пісьмовае папярэджаньне было пакінутае ў сіле.

Як дадаў адказны сакратар Управы Партыі БНФ Зьміцер Салошкін, партыя пад прымусам прадставіла ў Міністэрства юстыцыі уліковыя дакументы двух тысяч сябраў партыі, была зробленая іх праверка і дадаткова запатрабаваныя дакументы пра прыняцьцё ў шэрагі партыі за перыяд да 1999 года. Аналагічную працэдуру татальнай праверкі цяпер праходзяць і іншыя дэмакратычныя партыі – ім ужо вынесеныя прапановы міністэрства юстыцыі аб правядзеньні пераўліку сябраў.

Управа Сойму паведаміла, што справаздача пра дзейнасьць, фінансавыя паступленьні і выдаткі Грамадзкага аб’яднаньня БНФ “Адраджэньне” прынятая для публікацыі ў газэце “Наша Слова“. Прадугледжаныя законам звесткі і справаздачы таксама накіраваныя Грамадскім аб’яднанням БНФ “Адраджэньне” ў Міністэрства юстыцыі, уключна з інфармацыяй пра публікацыю справаздачы ў СМІ. Спараваздача Партыі БНФ таксама прадстаўленая ў міністэрства юстыцыі. Адказны сакратар Управы таксама нагадаў рэгіянальным кіраўнікам, што справаздачы арганізацыйных структур партыі абласнога і менскага гарадскога ўзроўню яшчэ павінныя быць прадстаўленыя і ў абласныя ўпраўленні юстыцыі, як таго патрабуе закон (публікацыя гэтых справаздачаў не патрабуецца).

У пытаньні парадку дня “Аб плянаваньні дзейнасьці партыі на 2021-2023 гады” быў заслуханы даклад намесьніка старшыні Партыі БНФ Вадзіма Саранчукова з выкладаньнем папярэдніх накідаў адносна магчымых прыярытэтаў у партыйнай дзейнасьці. У якасьці задачы для партыйных структур было названае стварэньне базавых дакумэнтаў развіьця рэгіёнаў, з якімі можна потым ісьці на мясцовыя і пардямэнцкія выбары (закрыўшы такім чынам максімальную колькасьць акругаў). У прыватнасьці, палітык падзяліўся досьведам стварэньня рэанімацыйнага пляну для Гарадзеншчыны.

Намесьнік старшыні Партыі БНФ Аляксей Янукевіч у прадстаўленьні плянаў камісіі партыйнага навучаньня выказаў прапанову аб актывізацыі працы з мясцовымі супольнасьцямі (уключна са згаданымі плянамі мясцовага развіцьця) і палітычнай асьветы. Выказаў прапанову агульнападітычнай кампаніі “Застаемся” супрць ад’езду актывістаў за мяжу. Прапанваў весьці працу ў кірунку адстойваньня захаваньня нормаў канстытуцыі пра нейтральны статус Беларусі – насуперак абвешчанай міністрам замежных справаў Макеям ідэі адмовы ад дадзенай канстытуцыйнай нормы. Выказаў ідэю весьці кампанію ў абарону бізнэсу: “У малога і сярэдняга бізнэсу цяпер няма іншай альтэрнатывы апроч як перамагаць” – сказаў Аляксей Янукевіч.

Сваю ацэнку дадзеных кампаніяз як перспектыўных і вартых абмеркаваньня выказаў старшыня Партыі БНФ Рыгор Кастусёў.

На прапанову намесьніка старшыні ГА БНФ “Адраджэньне” Юрася Меляшкевіча Сойм пастанавіў накіраваць у грамадзкі савет пры Міністэрстве культуры датычна аховы помнікаў гісторыка-культунай спадчыны сябру Сойма Зьміцера Дрыгайлу.

Было вырашана на наступным Сойме заслухаць прапановы што да плянаў працы культурніцкай камісіі (Алесь Марачкін) і жаночай камісіі (Надзея Салаўёва). Была агучаная просьба спн. Салаўёвай да сябраў партыі даслаць ёй прапановы па дзейнасці Жаночай камісіі.

Асобна Сойму была даведзеная інфармацыя пра падырхтоўку персанальнай выставы Алеся Марачкіна і агульнай выставы суполкі “Пагоня”, якія павінныя адчыніцца ў палацы Мастацтваў з нагоды памятнай даты 25 сакавіка.

Сойм Грамадзкага абъяднаньня БНФ “Адраджэньне” заслухаў інфармацыю пра стан перамоваў кіраўніцтва з уладамі і палітычнымі партыямі датычна арганізацыі масавай акцыі ў Менску з нагоды 103-й гадавіны абвяшчэньня трэцяй ўстаўной граматы Беларускай Народнай Рэспублікі. Была прыянтая заява Сойму з заклікам да легальнага (значыць – з афіцыйным дазволам ці ўведамленьнем згодна патрабаваньняў закону “Аб масавых мерапрыемствах”) і таму больш бясьпечнага для людзей адзначэньня памятнай даты 25 сакавіка – 103-й гадавіны абвяшчэньня трэцяй устаўной граматы Беларускай Народнай Рэспублікі ў 1918 годзе (публікуецца):

“Дзеля нармалізацыі сытуацыі ў краіне і дэманстрацыі магчымасьці рэалізацыі права грамадзян на ўдзел у мірных масавых акцыях мы заяўляем пра намер правесьці супольна з іншымі дэмакратычнымі партыямі і рухамі ў Менску масавую акцыю з нагоды адзначэньня 25 сакавіка 103-й гадавіны абвяшчэньня незалежнасьці БНР. Дзеля гэтай мэты мы рыхтуем адпаведную заяўку на парвядзеньне масавага мерапрыемства ў мясцовыя органы ўлады ў парадку, які вызначаны цяперашнім надзвычай жорсткім законам “Аб масавых мерапрыемствах”. Мы таксама заклікаем структуры дэмакратычных партыяў і грамадзкіх аб’яднаньняў ў розных гарадох і мястэчках падтрымаць гэтую ініцыятыву і падаваць адпаведныя заяўкі ды ўведамленьні на правядзеньне масавых акцыяў у парадку, які вызначаны заканадаўствам. Мы заклікаем органы ўлады не чыніць перашкодаў азначаным акцыям, у тым ліку з выкарыстаньнем нацыянальнай сымболікі, аказаць садзейнічаньне ў іх правядзеньні і забяспечыць рэалізацыю грамадзянамі Беларусі права на мірныя сходы ва ўмовах бясьпекі, што гарантаванае дзеючай Канстытуцыяй і міжнародным правам” - гаворыцца ў заяве.

Паводле інфармацыі кіраўніцтва БНФ, на момант правядзеньня Сойму была заключаная дамова Мінскай гарадзкой арганізацыі ГА БНФ “Адраджэньне” на медычнае абслугоўваньне мерапрыемства 25 сакавіка, з дамовай на ахову мерапрыемства з ГУУС быццам бы была дасягнутая згода, але праца замарудзілася па незразумелых прычынах. Менскі “Зелянбуд” ад заключэньня дамоваў незаконна адмовіўся.

Сп. Кастусёў падкрэсліў, што БНФ працуе ў складзе аргкамітэта, які быў створаны яшчэ да 100-годдзя БНР і які ў 2018 годзе зладзіў пасьпяховае адзначэньне стогадовага юбілею беларускай незалежнасьці.

Арганізацыйным структурам БНФ у рэгіёнах было прапанавана выйсьці з ініцыятывай падачы заявак на легальныя акцыі з нагоды 25 сакавіка ў сваіх гарадах, дзеля чаго управа можа аказаць неабходную метадычную падтрымку датычна заключэньня дагавароў і афармленьня заявак альбо уведамленьняў (для акцыяў у месцах, якія вызначаныя ў якасьці сталых месцаў для правядзеньня акцыяў мясцовымі ўладамі).

Рыгор Кастусёў таксама распавёў пра апошнія факты рэпрэсіяў супраць сябраў Партыі БНФ: нядаўна у сядзібе старшыні Партыі БНФ у Бялыніцкім раёне быў праведзены ператрус, а яго дачка Кацярына была затрыманая і дапытаная ў межах “чорнага аўторку” 16 лютага, калі па ўсёй краіне прайшлі рэйды супраць журналістаў і праваабаронцаў. Палітык асобна выказаў абурэньне жорсткім прысудам у дачыненьні да сябры Сойму Партыі БНФ Вітольда Ашурка, а таксама крымінальным перасьледам сябраў партыі і былых кандыдатаў у дэпутаты парлямэнту ад БНФ Паўла Юхневіча, Вадзіма Вінярскага і Зьміцера Казлова, якія цяпер знаходзяцца ў вязьніцы.

Рыгор Кастусёў праінфармаваў сябраў Сойму пра захады Партыі БНФ дзеля вызваленьня палітвязьняў у Беларусі – як сябраў партыі, так і ўсіх бязьвінна асуджаных актывістаў і пратэстоўцаў. Як было адзначана, для цяперашняга парадку дня партыі гэтые пытаньне будзе найвялікшым прыярытэтам ва ўнутранай палітыцы і на міжнароднай арэне.

Сябрам Сойму было прапанавана збіраць і накіроўваць ва ўправу зьвесткі пра выпадкі рознага кшталту перасьледу сябраў партыі.

Сойм Партыі БНФ прыняў рашэньне пра зьмяненьне юрыдычнага адрасу Гомельскай абласной арганізацыі Партыі БНФ і даручыў сябру Сойму Васілю Раманаву прадстаўляць партыю у працэсе рэгістрацыі новага адрасу і ўнясеньня зьменаў у часопіс рэгістрацыі (пастаноўкі на ўлік) арганізацыйных структур.

Сойм Грамадзкага аб’яднаньня БНФ “Адраджэньне” прыняў рашэньне пра зьмяненьне юрыдычнага адрасу ад’яднаньня і ўнес адпаведныя зьмены ў Статут арганізацыі згодна з артыкулам 10 закона Рэспублікі Беларусь “Аб грамадзкіх аб’яднаньнях”.

У розным Сойм заслухаў інфармацыю аб стане тэхнічнай і арганізацыйнай падрыхтоўкі партыі да кампаніі па выбарах дэпутатаў мясцовых саветаў дэпутатаў 29-скліканьня, што павінная распачацца ў другой палове года.

 

 

 

 

 

Красавік 2021
Пн Аў Сер Чц Пт Сб Ндз
« Сак    
 1234
567891011
12131415161718
19202122232425
2627282930  
© 2011 - 2021 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.