Суд адхіліў скаргу БНФ на фармаваньне выбарчых камісій у Мінску

Суддзя Мінскага гарадскога суда Сямак вынесла адмоўнае рашэньне па скарзе Партыі БНФ на фармаваньне тэрытарыяльных выбарчых камісій у Мінску.

Тэкст рашэньня апублікаваны на сайце судовай сыстэмы. Рашэньне ўступіла ў законную сілу неадкладна пасля абвяшчэньня і абскарджваньню у апеляцыйным парадку не падлягае.

Нагадаем, што ад БНФ у тэрытарыяльныя камісіі ў Мінску былі вылучаныя тры чалавекі: Зьміцер Касьпяровіч і Юрый Чавусаў ў Мінскую гарадзкую камісію і Андрэй Церашкоў у Цэнтральную раённую камісію. Аднак нікога з іх у выбарчыя камісіі ўлады не ўключылі. Увогуле па ўсёй краіне ад апазыцыйных палітычных партыяў у склад тэрытарыяльных выбарчых камісій ўключылі тролькі двух чалавек: прадстаўніка БНФ у Віцебскую абласную камісію і прадстаўніка БСДП “Грамада” у адну з раённых камісій. Усяго па краіне ў склад 153 тэрытарыяльных камісій увайшло 1989 чалавек. Такім чынам апазыцыя складае 0,1% ад агульнай колькасьці сябраў тэрытарыяльных выбарчых камісій.

Рашэньне Міснкага гарадскога суда камэнтуе Юрый Чавусаў, які прадстаўляў інтарэсы БНФ у працэсе разгляду справы:

– Рашэньне суда абсалютна не адлюстроўвае таго, што было насамрэч выяўлена падчас судовага разібральніцтва. Пры азнаямленьні з матэрыяламі справы мы пабачылі, што ў склад тэрытарыяльных камісій ўвайшлі людзі, чыё вылучэньне не было аформленае належным чынам. Наапрыклад, вылучэнцы Рэспубліканскай партыі працы і справядлівасьці аформілі паперы на вылучэньне ў склад камісій нядбайна і без пазначэньня неабходных дадзеных, таму у Мінгарвыканкама не было законных падставаў на уключэньне прадстаўнікоў гэтай структуры ў склад камісій. Таксама сур’ёзныя недахопы выявіліся ў паперах на вылучэньне прадстаўнікоў БРСМ, ГА “Белая Русь”, Беларускага саюза жанчын, Чырвонага Крыжа ды іншых праўладных псэўда-грамадзкіх аб’яднаньняў. Наадварот, пратаколы БНФ і Грамады былі афрмленыя бездакорна і мелі ўсе рэквізыты, якія патрабуюцца згодна з Выбарчым кодэксам.

Аднак у рашэньні суда абсалютна не даецца ацэнка таму факту, што ў склад камісій патрапілі людзі, вылучэньне якіх не было аформленае належным чынам і якія не мелі права быць у камсіях. Замест гэтага мы маем рашэньне, напісанае пад капірку са стандартным абгрунтаваньнем пра тое, што “Суд не мае права абмяркоўваць пытанні аб перавагах аднаго кандыдата перад другім, так як гэта не ўваходзіць у кампетэнцыю суда”.

Паказальна, што прадстаўнікі Мінгарвыканкама, як органа рашэньне якога аспрэчвалася ў гэтым судовым працэсе, нават не з’явіліся на судовае пасяджэньне і разгляд справы адбываўся ў іх адстунасьці. Гэта яскрава сьведчыць пра ролю судовай ўлады ў беларускай сыстэме, дзе яна выконвае другасную функцыю прыкрыцьця для свавольства органаў выканаўчай улады. Нажаль, у гэтай сыстжме суды пазбаўленая паўнамоцтваў і не могуць разглядацца як орган, які ў стане аднавіць парушаныя правы суб’ектаў выбарчага працэсу – сказаў Юрый Чавусаў.

Скарга ў суд з патрабаваньнем пра зьмяненьне складу тэрытарыяльных камісій пададзеная таксама ў Берасьцейскай вобласьці: напрыклад, у суд Бярозаўскага раёну пададзеная скарга на неўключэньне ў склад раённай выбарчай камісіі сябры Партыі БНФ Тамары Шчапёткінай.

Як адзначае намесьнік старшыні БНФ Зьміцер Салошкін, татальная зачыстка тэрытарыяльных камісій ад апазыцыі зьвязаная з памкненьнем не дапусьціць зьнешняга кантролю за працэсам праверкі подпісаў, сабраных за вылучэньне кандыдатаў:

“Колькасьць прадстаўнікоў апазыцыі ў тэрытарыяльных камсіях на гэтых выбарах беспрэцэдэнтна малая. Суды не задавальняюць скаргаў на рашэньні пра фармаваньне камсій – адмовы ўжо атрымалі і БНФ, і АГП. Усё робіцца для таго, каб не дапусціць грамадзкага кантролю не толькі за падлікам галасоў, але і за праверкай падпісных аркушоў. Відавочна, што цікаўнасьці выбаршчыкаў да гэтых выбараў няма, а ва ўмовах пандэміі COVID19 людзі папросту будуць пазьбягаць залішних сацыяльных кантактаў, у тым ліку дыстанцыявацца ад зборшчыкаў подпісаў. Таму будзе вялікі сумнеў у сапраўднасьці подпісаў” – сказаў Зьміцер Салошкін.

Як паведамляецца, суд Гомельскай вобласьці таксама адхіліў скаргу мясцовай структуры АГП на рашэньне пра фармаваньне Гомельскай абласной выбарчай камісіі.