Ніну Багінскую затрымлівалі двойчы — у дзень развітання з Шушкевічам і на 9 Мая

Ніну Багінскую затрымлівалі 7 і 9 мая перад яе домам — не далі даехаць на лецішча.

У дзень 7 мая ў архікафедральным саборы праходзіла развітанне з першым кіраўніком незалежнай Беларусі Станіславам Шушкевічам.

У суботу Ніна Багінская выйшла з дому каля 9 гадзін раніцы, каб паехаць за горад.

«Тут да яе падышлі пару людзей ў цывільным. Яны з машыны выйшлі, сказалі, што ім трэба з ёй паразмаўляць. Трымалі ў Першамайскім РУУСе сем гадзін. Гэта было ў дзень, калі хавалі Станіслава Шушкевіча, — маці пра гэта і не ведала. Яе прэвентыўна затрымалі. Здаецца, яны ёй пра развітанне з Шушкевічам ва ўчастку і расказалі», — распавёў сын жанчыны.

Праз дзень гісторыя амаль паўтарылася. Ніна Багінская гэтаксама збіралася на лецішча. 9 Мая, кажа сын, яна не адзначае.

«Яе ранкам ужо чакалі, затрымалі, каб яна нідзе ў горадзе не з’явілася. Таксама трымалі цэлы дзень. Пратаколаў ніякіх не складалі».

Да лецішча Багінская ўсё ж даехала.