Партыя БНФ » Людміла Рамановіч асуджаная на паўтара гады зняволення
Партыя БНФ - партыя абароны народных інтарэсаў


Людміла Рамановіч асуджаная на паўтара гады зняволення

Дададзена 20.06.2022 3:20:50 | 369 праглядаў

У судзе Маларыцкага раёна 20 чэрвеня вынесены прысуд па крымінальнай справе палітзняволенай актывісткі Партыі БНФ Людмілы Рамановіч. Яе абвінавацілі ў абразе прэзідэнта (арт. 368 Крымінальнага кодэкса), зробленай у лісце, які жанчына даслала ў Следчы камітэт.

Людміла-РамановічНапачатку сакавіка 2022 года спадарыня Людміла Рамановіч звярнулася з адкрытым лістом пратэста на адрас адміністрацыі Лукашэнкі. Жанчына выказала пратэст супраць удзелу Беларусі ў вайне супраць Украіны.

Я бачу небяспеку, у якую ўвязаў нас Пуцін са сваімі войскамі. Мы не можам прымаць у гэтым удзел. Краіна Беларусь – гэта не чыёсьці там лецішча: каго хачу, таго і запрашаю на шашлыкі. Я патрабую вывесці чужое войска з Беларусі!  Украінцы нам не чужыя. І такім, як я і спадар Лукашэнка, варта падумаць аб тым, колькі ў нас украінскай крыві. Мне сорамна, што з нашай зямлі ляцяць ракеты ў бок мірных жыхароў Украіны.  Баюся, што беларускіх сыноў могуць адправіць на пагібель. Паляшук не павінен забіваць палешуку па тым баку мяжы. Палешукі з украінскага боку не павінны ўважаць беларускіх палешукоў забойцамі. Нам з украінцамі дзяліць няма чаго” – пісала ў сваёй заяве спадарыня Рамановіч.

22 сакавіка актывістку затрымалі, 4 красавіка ў доме Людмілы Рамановіч прайшоў ператрус, а 7 красавіка яе змясцілі ў СІЗА Брэста.

Падчас абвяшчэння абвінавачання высветлілася, што падставай для крымінальнага пераследу актывісткі з’яўляецца слова «ўзурпатар» з яе ліста ў Следчы камітэт. Пракурор Міховіч 17 чэрвеня запрасіў суд прызначыць 57-гадовай палітзняволенай пазбаўленне волі ў калоніі агульнага рэжыму тэрмінам на адзін год і 6 месяцаў.

Суддзя Вольга Смірнова 20 чэрвеня агучыла прысуд: прызнаць актывістку вінаватай па ч.1 арт.368 Крымінальнага Кодэксу і прызначыць пакаранне ў выглядзе аднаго года і шасці месяцаў калоніі агульнага рэжыму.

Людміла Рамановіч з’яўляецца сябрам Партыі БНФ, у 2012 годзе вылучалася кандыдатам у дэпутаты Палаты прадстаўнікоў ад Партыі БНФ па Белавескай выбарчай акурзе, але зняла сваю кандыдатуру па рашэнні партыі ў сувязі з нядопускам прадстаўнікоў БНФ у  склад участковых выбарчых камісій і не вызваленнем палітвязняў. Таксама была вылучаная кандыдатам ад Партыі БНФ на парламенцкіх выбарах у 2016 годзе.

Падтрымаць Людмілу Рамановіч у зняволенні можна лістом. Адрас для лістоў: СІЗА-7. 224030, г. Брэст, вул. Савецкіх памежнікаў, 37, Рамановіч Людміле Сяргееўне

Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце пакідаць сваё імя ў тэксце тэлеграмы.

Таксама можна накіраваць грашовы перавод, які вязень можа скарыстаць каб набыць харчаванне ў у шапіках СІЗА. Магчымы перавод грашовых сродкаў праз інтэрнэт-банкінг і мабільны-банкінг. Выканайце грашовы пераказ (адвольны плацёж) па пазначаных ніжэй рэквізітах і не забудзьцеся ўпісаць цалкам прозвішча, імя і імя па бацьку палітвязня і СІЗА ў прызначэнні плацяжу.

Людмила Сергеевна Романович — СИЗО-7

УНП: 200292322
BIC: BAPBBY2X
IBAN: BY49BAPB36429921800110000000

Таксама можна даслаць пасылку ці бандэрольку з рознымі прысмакамі і прыемнымі дробязямі. Гэта вялікая дапамога сем’ям вязняў і добрая падтрымка саміх зняволеных, асабліва ў святы. Калі ласка, не трэба адносіць палітвязням перадачы без узгаднення са сваякамі, бо ў СІЗА ўстаноўлены ліміт на перадачы па вазе – 30 кг на месяц. Пры гэтым пасылкі маюць абмежаванні толькі ад пошты – ў адной пасылцы можна адсылаць рэчаў да 50 кг за раз.  У бандэроль ці пасылку можна пакласці гарэхі, курагу, фінікі, цукаты, цукеркі, зефір, мармелад, пасцілу, халву, шакалад, печыва, сухары, апельсіны, мандарыны, грушы, яблыкі, лімоны, каву любую, чай ліставы, суп, бульбу і макароны, вяленае мяса, каўбасу (сыравяленая, сыравэнджаная), салёнае сала, салёную рыбу, сыр, цыбулю рэпчатую, свежую зеляніну, часнык, агуркі, памідоры, перац, канверты, маркі, аркушы паперы, асадкі, фламастары, алоўкі, сшыткі, цыгарэты, запалкі ды іншае.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Жнівень 2022
Пн Аў Сер Чц Пт Сб Ндз
« Ліп    
1234567
891011121314
15161718192021
22232425262728
293031  
Навіны Моладзі БНФ
© 2011 - 2022 ПАРТЫЯ БНФ. Усе правы абароненыя. Перадрукоўка дазваляецца толькі пры выкарыстаньні гіпэрспасылкі на сайт ПАРТЫІ БНФ.