Ніну Багінскую затрымлівалі на Дзень Волі

Сябра Сойму Партыі БНФ Ніна Багінская была затрыманая ў Дзень Волі — яе выпусцілі толькі ўвечары.

У дзень Волі, 25 сакавіка, у Мінску затрымлівалі Ніну Багінскую. А 12:30 сілавікі прыйшлі за ёй дадому і без усялякіх тлумачэнняў прывезлі ў РУУС Першамайскага раёна.

Спадарыню Ніну пратрымалі ў міліцыі да позняга вечара — яе адпусцілі з пастарунку толькі бліжэй да 21-й гадзіны.

Не выключана, што менавіта такім чынам міліцыянты вырашылі не даць магчымасці «нязломнай Ніне» выйсці на цэнтральную плошчу сталіцы з нацыянальным бела-чырвона-белым сцягам. Яна так рабіла ва ўсе часы, нягледзячы на іх суровасць.

Цягам апошніх тыдняў сілавікі амаль штодзённа ладзілі масавыя затрыманні і ператрусы ў розных рэгіёнах краіны. Пасля гэтага на некаторых затрыманых складалі адміністрацыйныя пратаколы за нібыта распаўсюд экстрэмісцкіх матэрыялаў і несанкцыянаванае пікетаванне.

З 15 сакавіка было асуджана не менш за 166 беларусаў паводле палітычных артыкулаў — гэта без уліку Менска. Так, рэйды сілавікоў адбываліся ў Пінску, Мёрах, Оршы, Сянне, Глыбокім, Мазыры, Берасці, Івацэвічах, Лепелі, Полацку, Наваполацку, Гомелі ды іншых гарадах.